Juma kúni Qazaqstannyń basym aýmaǵy antıtsıklonnyń yqpalynda bolady - Qazgıdromet
ASTANA. 8 jeltoqsan. QazAqparat - «Qazgıdromettiń» boljaýynsha, 9 jeltoqsan kúni Qazaqstannyń basym aýmaǵy antıtsıklonnyń yqpalynda bolady, bul kún jaýyn-shashynsyz ótedi dep kútilýde.
Atap aıtqanda, Qyzylorda, Ońtústik Qazaqstan, Jambyl, Shyǵys Qazaqstan, Soltústik Qazaqstan, túnde Aqmola, Qostanaı oblystarynda tuman túsedi.
Almaty oblysynyń keı jerlerinde de tuman basady. Jalańashkól aýmaǵynda sekýndyna 18-23 metr jyldamdyqpen soǵatyn jeldiń ekpini keı ýaqyttary 28 metrge jetýi yqtımal.
Mańǵystaý, Atyraý oblystarynda 15-22 m/s jel men tuman túsýi boljanýda.
Aldaǵy táýlikte Qazaqstannyń ózen-kólderinde muz qatý úderisi jalǵasady. Eldiń ońtústik, ońtústik-shyǵys jáne shyǵysyndaǵy ózenderde muz qatýyna baılanysty sýdyń deńgeıi kóterilýi múmkin.
