«Juldyzdy soǵystar: Kúshtiń oıanýy» fılminiń qazaq tilindegi treıleri jaryqqa shyqty
ASTANA. QazAqparat - «Juldyzdy soǵystar: Kúshtiń oıanýy» («Star Wars: Episode VII - The Force Awakens») ǵarysh sagasynyń tolyqqandy qazaqsha treıleri jaryqqa shyqty.
Fılmniń qazaq tilindegi nusqasy «Juldyzdy soǵystar: Kúshtiń oıanýy» degen ataýǵa ıe bolypty. Bir qyzyǵy, jyldyń basynda jaryq kórgen qazaqsha tızer-treılerde ataýy basqasha edi, ol kezde beıneorolık «Juldyzdar shaıqasy: Kúshtiń serpilisi» dep jarııalanǵan bolatyn.
«Star Wars» franshızasynyń jetinshi epızody - qazaq tiline dýblıajdalǵan 13-shi gollıvýdtyq joba. Dýblıaj jumystary «Araymediagroup» stýdııasynda «Bolashaq» qaýymdastyǵynyń uıymdastyrýymen, Almaty qalasy ákimdiginiń, «Nur Otan» partııasynyń jáne «MARWIN» kompanııasynyń qoldaýymen júzege asty. Fılm Qazaqstan prokatyna qazaq jáne orys tilderinde 2015 jyly 17 jeltoqsanda shyǵady, dep habarlaıdy kinostan.kz.
