«Juldyzdy sát» telejobasynyń 5 mln. teńgesi kimge buıyrdy?
ASTANA. 9 maýsym. QazAqparat - Senbi, 8 maýsym kúni «Qazaqstan» Ulttyq arnasynda «Juldyzdy sát» megajobasynyń aqtyq syny ótti.
Jarty jyldan beri kórsetilip kele jatqan jobanyń qorytyndy saıysyna qınalmaı jetkenderdiń qatarynda Ásel Quljanova (rettik nómiri - 1) men Taraz qalasynan kelgen «býynsyz bala» atanǵan Eskendirdiń (2) ónerine bul joly da qoshemet erekshe boldy.
Ermek Baljigittiń (3) oryndaǵan Súgirdiń termesine qazylar alqasy biraýyzdan qoldaý kórsetti. «Eki ezý» satıra teatry (4) aldyńǵy kezeńderde sahnalyq kórinisteri úshin kóp daýys jınaǵan bolatyn. Olar bul joly sahna tórine alyp shyqqan «Kóleńkeli teatr» Qazaqstanda áli keń etek jaıa qoıǵan joq. Qazylar alqasy olardyń jańashyldyǵyn erekshe baǵalady.
Qaraǵandylyq Arman Qarynsaý (5) kórermenderdiń eń kóp daýsyn jınap, aqtyq synǵa birden ótken bolatyn. Ózi shyǵarǵan ándi oryndaǵan Arman jankúıerlerge keremet kóńil kúı syılaı bildi.
Al, sońǵy dodoǵa daıyndaǵan kórsetilimin kúrestiń Olımpıada oıyndary qatarynda qalýyna arnaǵan astanalyq Sergeı Tsyrýlnıkov (6) qazaq palýany Qajymuqandy pir tutady.
Jetinshi bolyp óner kórsetken Dınara Namııaly (7) «ónerin - ómirim», dep sanaıdy. Sebebi onyń aıtýynsha, «Juldyzdy sát» onyń taǵdyryna tyń jańalyqtar alyp kelgen.
Kúni keshe ǵana Aqtaý qalasynda Ulttyq biryńǵaı testileýden 86 ball jınaǵan Danııar Amangeldi (8) sahna synynan ótti. Ónerli órenniń de armany - juldyz bolý.
Daýys berý arqyly jeńimpazdy anyqtaý kórermender men jankúıerlerge ońaı bolmaǵanymen «júzden júırik myńnan tulpar» shyqqan Ermek Baljigit úshinshi oryndy mise tutty. Ekinshi oryn «Eki ezý» teatry ujymyna buıyrdy, al «Juldyzdy sáttiń» júldesi 5 mıllıon teńgeni Arman Qarynsaý ıelendi.
