«Juldyzdy sát»: 5 mln. teńge kimge buıyrady?
ASTANA. 5 mamyr. QazAqparat - «Juldyzdy sát» telejobasynyń jartylaı fınalyn kórermender «Qazaqstan» ulttyq arnasynda tikeleı efırde tórt apta boıy tamashalady.
Maýsymnyń biri kúni jartylaı fınaldyń sońǵy toby óz ónerin ortaǵa saldy. Ásem bezendirilgen, joǵary sapaly tehnıkamen jabdyqtalǵan sahnada jańa óner týyndylary usynyldy. Júrek qylyn shertip, ulttyq namysyńdy oıatatyn Marjan Arapbaevanyń oryndaýyndaǵy «Qazaq eli» ánin naqyshyna keltire shyrqaǵan Jadyra Ernar men polıaktyń halyq ánin esh súıemeldeýsiz oryndaǵan «Vid Men» toby osy keshti ánmen áserli kúıge bóledi. Áýede arqanǵa ilinip turyp qaterli qımyldarmen eldi tańqaldyrǵan aǵaıyndy Qadyrovtardyń óneri barsha qaýymnyń kóńilinen shyqty. Osy toptaǵy eń qaýipti kórinis Ádilbek Dúısebekovtiń birneshe oryndyqty biriniń ústine birin qoıyp, ózi eń joǵaryda jaıǵasyp otyrýy boldy. Jasy elýdi shamalap qalsa da jeńil ári sergek qımyldaıtyn jigit aǵasynyń ózgeshe óneri tym áserli shyqty. «Orkestr adam» atalǵan Beıbarys Asqarbekovtyń keńirdegimen túrli dybystar shyǵarý arqyly oryndaǵan bıtboksy men daýylpazdy dúbirlete soqqan «Drum Line» tobynyń óneri de ózgelerden qalyspady. Alaıda kórermenniń ystyq yqylasyna bólenip, eń kóp daýys jınaǵan - Danııar Amangeldi boldy. Robot bıin bılegen Danııardyń kıimi de, qımyly da erekshe boldy. Jınaǵan daýystarynyń sany jaǵynan shamalas shyqqan «órmekshi bala» atanǵan Eskendir men «Taekvondo-Baıdilda» sport mektebi shákirtteriniń sahnadaǵy taǵdyryn qazylar alqasy sheshti. Tóreshilerdiń basym daýysymen Eskendir aqtyq synǵa ótti.
Osylaısha irikteý kezeńinen tańdap alynǵan qyryq adamnyń sońǵy toby jartylaı fınalda óner kórsetip, aqtyq synǵa ótken segiz úmitker anyqtaldy. Alda sheshýshi syn. Bes mıllıon teńge óz ıesin tosyp tur. Qomaqty aqsha kimge buıyrady? Qaı ónerpazdyń baǵy janady? Ony 8-maýsymda Qazaqstan ulttyq arnasynda «Juldyzdy sát» megajobasynyń fınalynda kóremiz.
Talǵampaz kórermenniń kóńilinen shyqqan, dúıim jurtty dúrliktirgen tańǵajaıyp jobanyń jalyndy jankúıeri bola bilińiz! Eger siz ózińizge unaǵan úmitkerge daýys bergińiz kelse, laıyqty dep tapqan ónerpazdyń rettik sanyn 3075 qysqa nómirine SMS arqyly joldańyz nemese 8 80 90 80 30 75 nómirine qońyraý shalyńyz.
Aqtyq synda óner kórsetetin bes mıllıonnan úmitker ónerpazdardyń rettik sany:
1. Ásel Kuljanova 01
2. Eskendir 02
3. Ermek Bajigit 03
4. «Eki ezý» satıra teatry 04
5. Arman Qarynsaý 05
6. Sergeı Tsyrýlntkov 06
7. Dınara Namııaly 07
8. Danııar Amangeldi 08
