«Juldyzdar jumbaǵy» - respýblıkalyq basylymdarǵa sholý

 Keshe Qazaqstan Respýblıkasy Prezıdentiniń Almatydaǵy rezıdentsııasynda Memlekettik hatshy - Syrtqy ister mınıstri Qanat Saýdabaev bir top azamattarǵa memlekettik nagradalar tapsyrdy. Tolyǵyraq «Egemen Qazaqstan» basylymynyń búgingi sanyndaǵy «Memlekettik nagradalar laıyqty ıelerin tapty» degen taqyryptaǵy maqalaǵa nazar aýdaryńyz.

Osy taqyryptaǵy maqalany «Aıqyn» gazetiniń búgingi sanynan da oqı alasyzdar.

«Basqa jerdi qaıdam, bizdiń Syr óńiri - ekologııalyq apatty aımaq. Aq bas tolqyndary jarysa júıtkip, jaǵany urǵylap jatatyn Aral teńizi qalaı tartyla bastady, solaı Syr aımaǵynda 70-jyldary ekologııalyq qasiret kórnis berdi. Bul qasiret jyldan jylǵa ýshyǵyp, ekologııalyq apatqa alyp keldi»,- dep jazǵan «Egemen Qazaqstan» basylymyndaǵy kelesi maqala «Óńirdiń orman sharýashylyǵy ońalsa, tuz ben qum kóshkeni toqtar edi»  taqyrybymen aýqymdy ekologııalyq máselege nazar aýdarypty.

Sondaı-aq basylymnyń búgingi sanynda «Qazaqstan Respýblıkasynyń Qylmystyq, Qylmystyq is júrgizý jáne Azamattyq is júrgizý kodeksterine sot júıesin jetildirý máseleleri boıynsha ózgerister men tolyqtyrýlar engizý týraly» zańy  jarııalanǵan.

Astrofızıkalyq zertteýler ortalyǵy men onyń enshiles kásiporyndaryn qaıta jasaqtaý men biriktirýdiń arqasynda osydan 2 jyl buryn qurylǵan «Ulttyq ǵaryshtyq zertteýler men tehnologııalar ortalyǵy» AQ ǵylymnyń qaıta jandanýyna, ǵaryshtyq zertteýlerdi júrgizip jatqan ǵalymdardyń jemisti jumys isteýine, ǵaryshtyq tehnologııalardy jedel damytýǵa jol ashyp berýge tıis bolatyn. Álemniń aqparattyq tehnologııalar júıesi osy salany damytqan elderdiń «tárelkesine» táýeldi bolyp otyrǵanda, bizdiń ulttyq ortalyqtyń qyzmeti qandaı ekendigi oqyrmandar qyzyǵýshylyǵyn týdyratyny sózsiz. Basylymnyń búgingi sanynda «Juldyzdar jumbaǵy» degen taqyryppen jańa ortalyqtyń jetekshisi, professor, fızıka-matematıka ǵylymdarynyń doktory, Jumabek Jantaevpen bolǵan suhbat jaryq kóripti.

***

Ótken aptanyń sońynda Almaty irgesindegi «Aqbulaq» demalys ornynda, TMD-ǵa múshe Qazaqstan, Reseı, Belarýs, Túrkimenstan, Armenııa, Tájikstan jáne Qyrǵyzstan prezıdentteri beıresmı jaǵdaıda kezdesti. Atalmysh kezdesýdiń egjeı-tegjeıin «Aıqyn» basylymynyń  búgingi sanyndǵy «Aqbulaq jeti eldiń prezıdentine esik ashty» degen taqyryppen berilgen maqaladan oqı alasyzdar.

«Ońtústikte áıelder neden ólip jatyr?» Osyndaı saýalǵa qurylǵan atalmysh basylymdaǵy kelesi maqala ómirden erte ozyp jatqan jas analardyń taǵdyryna nazar aýdarǵan. «Sońǵy bir jarym aıda Ońtústik Qazaqstan oblysynda júkti jáne jańa bosanǵandardy qosqanda 10 áıel qaıtys bolypty. Jalpy, bıylǵy jyldyń basynan beri qaıtys bolǵan analardyń sany 27-ge jetipti»,- deıdi basylym.

«Iá-ıá, dál solaı! Qojanasyr tiri eken! Siz áli estimedińiz be? Senbeseńiz, M. Áýezov atyndaǵy Qazaq Memlekettik akedemııalyq drama teatryna baryńyz. Qojanasyrdy óz kózińizben kóresiz!»,- dep jazǵan «Aıqyn» basylymyndaǵy taǵy bir maqala  «Qojanasyr tiri eken!» atty jańa qoıylymnyń tusaýy kesilgendigin jazypty.

 Sondaı-aq, Birjan saldyń «Láılim shyraq»  ániniń shyǵý tarıhyn bilgińiz kelse, osy basylymnyń  «Qazaqtyń 100 áni» aıdaryna da zer salyńyz.

***

Táýelsizdik kúni qarsańynda Astana qalasynyń ákimi Imanǵalı Tasmaǵambetov elordanyń bir top turǵynyna memlekettik nagradalardy tabys etti. Tolyǵyraq «Astana aqshamy» basylymynyń búgingi sanyndaǵy «Elordalyqtar memlekettik marapatqa ıe boldy» degen taqyryptaǵy maqaladan oqı alasyzdar.

«Syrdarııa oblysy, Qazaly ýezine qarasty Myrzas aýylynda týyp-ósken, keıin «halyq aqyny» atanǵan Nurtýǵan Kenjeǵululynyń osydan bir ǵasyr buryn, 1910 jyly uıymdastyrǵan óner mektebiniń ózine ǵana tán, dástúrli maqam-sazdary bolǵan. Alaıda ýaqyt óte sol qaıtalanbas mýzykalyq týyndylardy dúnıege keltirgen talant ıeleri kóbine umyt qalyp, shyǵarmalary basqa bireýlerge telinip kete baratyn jaǵdaılar kezdesedi»,- dep jazǵan «Astana aqshamy» gazetindegi kelesi maqala «Kánekı, tilim, sóıleshi»  taqyrybymen jaryq kórgen.  

«Táýelsizdik kúni astanalyqtar men elorda qonaqtary úshin jeńistiń jalaýyn jelbiretken merekege ulasty. Bul kúni Qazaqstannyń áýesqoı boks federatsııasy Astana jáne Gavana boksshylarynyń matchtyq kezdesýin uıymdastyrdy. Sharshy alańǵa 11 jup kóterilip, naǵyz «jan alyp, jan berisken» jekpe-jekterdi kórdik»,- dep jazdy «Astana aqshamy» gazeti. Sharshy alańnyń qyzyǵyn basylymdaǵy «Jigitterimiz jarady» degen atpen berilgen maqaladan oqyńyzdar.

***

«Kazahstanskaıa pravda» gazeti elimizge saparmen  Búkil Reseı jáne Máskeý Patrıarhy Kırıldiń keletinin habarlaıdy. Astana jáne Almaty mıtropolıti Mefodıı keshe Almatyda Elbasynyń qabyldaýynda bolyp, Qazaqstandaǵy pravoslav shirkeýiniń jaǵdaıymen tanystyrǵan jáne aldaǵy qańtar aıynyń ekinshi onkúndigine josparlanyp otyrǵan Búkil Reseı patrıarhynyń sapary týrasynda sóılesken. Onyń aıtýynsha, patrıarh Astana men Almaty qalalaryna at basyn tiremek.

«Lıter» basylymy búgingi sanynda Úkimet basshysy K. Másimovtiń Batys Qazaqstan jáne Aqtóbe oblystaryna jasaǵan saparyna toqtalǵan. Úkimet basshysy osy óńirlerdegi mańyzdy memlekettik baǵdarlamalardyń júzege asý barysyn teksergen, sondaı -aq Qarashyǵanaq -Oral gaz qubyryn ashyp, Ekonomıkany jańǵyrtý jónindegi Memlekettik komıssııanyń mashına jasaý jáne hımııa ónerkásibin, tarıf qalyptastyrý saıasatyn damytý máseleleri boıynsha kóshpeli otyrysyn ótkizgen.

Al  «Ekspress-K» gazeti búgingi sanynda Ońtústik Qazaqstan oblysyndaǵy mektepterde oqýshy qyzdardyń sabaqta hıdjappen júrgisi kelýine baılanysty taǵy bir daý týǵanyn jazǵan. Gazettiń jazýynsha, bul máselege qatysty Bilim jáne ǵylym mınıstrligi men Ádilet mınıstrligi eki túrli kózqarasty ustanýda. Tolyǵyraq osy gazetten oqyńyzdar.