«Juldyzdar soǵysyn» túsirgen kompanııa akterdiń qaýipsizdigin saqtaýǵa nemquraıdy qaraǵany úshin sotqa berildi
ASTANA. QazAqparat - Ulybrıtanııanyń Densaýlyq jáne qaýipsizdik máseleleri jónindegi komıteti «Juldyzdar soǵysy» kúshtiń oıanýy» fılmin túsirýshi Foodles Production kompanııasyn sotqa berdi. Oǵan túsirý alańynda akter Harrıson Fordtyń aıaǵyn syndyryp alýy jáne taǵy sekildi tórt aıyptaý sebep bolǵan.
Eki jyldan ótip ketse de sheneýnikter kompanııany sotqa tartyp jatyr. Alǵashqy sot otyrysy 12 mamyrda ótiledi dep kútilýde.
«Zań boıynsha jumys berýshi qyzmetkerin qorǵaýdyń barlyq is-sharalaryn qolǵa alýy tıis. Bul zaýyttaǵy óndiris alańyna ǵana emes, sondaı-aq túsirilim alańyna da qatysty. Biz tekserý júrgizdik, isti sot talqysyna ákelýge barlyq negiz bar dep sanaımyz», delingen atalmysh komıtettiń málimdemesinde.
Sheneýnikter brıtandyq zańnamaǵa sáıkes, Foodles Productions kompanııasy túsirilim barysynda týyndaýy múmkin qaterlerdi eskerý, boldyrmaýǵa jaýapty ekendigin alǵa tartýda.
Eske sala ketsek, 2014 jyly 12 maýsymda túsirilim kezinde akter Fordtyń aıaǵyna juldyz kemesiniń esigi qulap ketken. Aıaǵy synǵan akterdi keıin kınoǵa tek belinen joǵary ǵana túsiripti.
«Juldyzdar soǵysy» kúshtiń oıanýy» fılmin jurt qyzyǵa tamashalady, bul kıno álem boıynsha «Avatar» men «Tıtanık» teletýyndysynan keıin 2 mlrd dollardan astam tabys tapqan.
