Juldyzdar saılaý naýqany jaıynda pikirlerin bildirdi
ALMATY. QazAqparat - Búgin Almatydaǵy Ortalyq kommýnıkatsııalar qyzmetinde «Seniń daýysyń - seniń bolashaǵyń!» atty posterler baıqaýynyń barysy jaıly aıtyldy. Jıynǵa tanymal ánshi, sportshy, qoǵam qaıratkerleri qatysty.
Ánshi Tolqyn Zabırova óziniń saılaýǵa qatysty oıyn bildirdi.
«Mundaı konkýrsty ótkizý dástúrli sharaǵa aınalyp barady. Bul baıqaý óz eliniń taǵdyryna beı-jaı qaramaıtyn azamattar úshin mańyzdy doda. Men úshin qazylar alqasynda bolyp, qatysýshylardyń jumysyn baǵalaý úlken abyroı. Bıyl el táýelsizdiginiń 25 jyldyǵy toılanady. Sondyqtan, bıylǵy saılaýda bizdiń jaýapkershiligimiz birneshe ese artady. Adamnyń otansúıgishtik sezimin bildirýge múmkindik beretin birneshe tásil bar. Biraq, sonyń eń ozyǵy - saılaýǵa kelip, óz daýsyńdy berý», - dedi ánshi.
Bylǵary qolǵap sheberleri Álem chempıony Nazym Qyzaıbaı men Azııa chempıony Darıǵa Shákimova da qazaqstandyqtardy saılaýǵa qatysýǵa shaqyrdy.
«Qazaqstan bolashaǵy - ol bizdiń bolashaǵymyz. Saılaýǵa ár jastyń qatysýy óte mańyzdy. Sportshylar jattyǵýdan ózge osyndaı sharalarǵa da qatysýy tıis. Byltyrdan beri ózimniń daýys berý quqyǵymdy júzege asyryp júrmin», - dedi N.Qyzaıbaı.
Ánshi Álı Oqapov bolsa saılaýǵa qatysý óziniń azamat retindegi paryzyn óteý dep sanaıdy.
«El nazarynda júrgen adam retinde úlgi bolýymyz kerek. Kelip óz pikirimdi aıtyp, tyńdarmandarymdy (saılaýǵa) shaqyryp júrmin. Bizdiń bolashaq - bizdiń qolymyzda. Osyndaı baıqaýlar arqyly shyǵarmashylyq qabiletińdi kórsetýge múmkindik bar. El bizben baılanysta», - dedi ol.
Ánshi óziniń úzeńgilesteri Qaırat Nurtas pen Janar Doǵalova sııaqty Parlament depýtattyǵyna úmitker bolýǵa ózin daıyn emespin deıdi.
«Men qarsy emespin. Ekeýi de tanymal adamdar. Óner jaǵynan mańyzdy qujattardy ázirleıtin shyǵar. Saılaýǵa pıar jaǵynan jarnama jaǵynan qoldaý kórsetý úshin qatystyryp jatqan shyǵar dep oılaımyn. Bir jaǵynan, árkim óz isimen aınalysýy kerek dep sanaımyn. Men - mýzykantpyn. Jan-jaqty bolýǵa daıyn emespin», - dedi Á.Oqapov.
Aıta ketý kerek, «Seniń daýysyń - seniń bolashaǵyń!» atty posterler baıqaýynyń uıymdastyrýshylaryna 3 aptanyń ishinde 200-den astam jumys túsken. Avtorlardyń kóbi 25 jasqa deıingi jastar.
Dızaınerler men programmısterden bólek shahterler men órt sóndirýshilerden túsken jumystar bar. Ótinimder 24 naýryzǵa deıin qabyldanady.
Eske sala ketsek, «Seniń daýysyń - seniń bolashaǵyń!» atty posterler baıqaýy byltyr da ótkizilgen bolatyn.
