Juldyzshylardyń boljamy: 2026 jyl qandaı bolady
ASTANA. KAZINFORM – Sandardyń sıqyryna senetinder úshin 2026 jyl erekshe bolmaq. Kazinform agenttiginiń tilshisi mamandardyń boljamyn saralap, keler jyldyń qandaı ózgerister ákeletinin zerttedi.
Nýmerologııa mektebiniń negizin qalaýshy Aıman Jetpisbaeva 2026 jyl «1 sanynyń» rýhanı energııasymen úılesetinin atap ótti.
– Bul – jańa bastamalardyń irgetasy qalanatyn kezeń. Aýqymdy ózgerister boljanady. Jyldyń stıhııasy – ot. Ol – jyldamdyqtyń, qozǵalystyń, progrestiń sımvoly. Sondyqtan keler jyly barlyq sala qarqyndy damıdy. El úshin jyl strategııalyq damý vektoryn belgileý, eski oılaý modelinen shyǵý jyly bolyp sanalady, – deıdi Aıman Jetpisbaeva.
Nýmerologtiń aıtýynsha, 2026 jyl qurylymdyq ózgeristerge toly.
– Ol burynǵydan ózgeshe áreket etýge jáne qabyldanǵan sheshimderge jaýapkershilikpen qaraýǵa shaqyrady. 2026 jyldy ǵylym, sport jáne IT jyly deýge bolady. Bul salada buryn-sońdy bolmaǵan aýqymdy qadamdar jasalady. Avtomattandyrý, tsıfrlandyrý, jańa servıster men jasandy ıntellekt qarqyndy damıdy, – deıdi ol.
Sondaı-aq, jyl reformalardy bastaýǵa jáne jańa basqarý modelderin engizýge qolaıly.
– Bul kezeńde mańyzdy kontseptsııalar, strategııalar qabyldanýy múmkin. Ekonomıka úshin jyl qaıta qurylymdaý kezeńi sanalady. Qarjy salasynda belsendilik artady, al bıznes úshin jańa jobalardy bastaý, ásirese ınnovatsııa men tehnologııa salasynda tıimdi bolady. Eńbek naryǵy transformatsııalanýy múmkin. Dástúrli mamandyqtar yǵysyp, jańa daǵdylarǵa suranys artady, – dep túsindirdi nýmerolog.
Al belgili astrolog Vıktorııa Skvırskaıa 2026 jyly tabys belsendi áreket etip, ádettegi sheńberden shyǵa alatyn adamdardyń janynan tabylatynyn jetkizdi.
– Jyldyń basty favorıtteri – egizder, shaıan jáne arystan. Bul belgilerdi kásibı ósim, tabystyń artýy jáne oń ózgerister kútedi. Al sýquıǵysh, bıkesh pen toqty belgilerinde qıyndyqtar týyndaýy múmkin, – deıdi astrolog.
Vıktorııa Skvırskaıa barlyq belgilerge belsendi bolýǵa jáne sheshimderdi batyl qabyldaýǵa keńes beredi. Densaýlyqqa da mán berý mańyzdy.
– Bul jyly densaýlyqqa, ásirese júıke júıesine erekshe kóńil bólgen durys. Ózgeristerdi kútpeı, ómirin ózgertýdi ár adam ózinen bastaý kerek, – dep keńes berdi ol.
Astrologtiń aıtýynsha, ot stıhııasyn kóteretin jandarǵa, ıaǵnı 1966-1967, 1976-1977, 1986-1987, 1996-1997, 2006-2007 jyldary týǵan jandar úshin jyl sátti bolady. Sonymen qatar týǵan kún men aıdyń qosyndysynan 1, 5, 6 nemese 8 sany shyqqan adamdar úshin de jyl qolaıly.
Vıktorııa Skvırskaıa jyldamdyqqa toly jylda saq bolýǵa shaqyrady.
– Ot – jyldam stıhııa. Demek, oılanýǵa da ýaqyt tapshy bolady, tez sheshim qabyldap úırený qajet. Aqpan jáne jaz aılarynda tabıǵı apattarǵa baılanysty saq bolǵan jón, – deıdi astrolog.
Aıta keteıik, shyǵys kúntizbesi boıynsha 2026 jyl – qyzyl otty Jylqy jyly. Ol 2026 jyldyń 17 aqpanynda bastalyp, 2027 jyldyń 5 aqpanyna deıin jalǵasady.
Aıta keteıik, «Qazgıdromet» Jańa jyl qarsańyndaǵy kún raıy boljamyn usyndy.