«Juldyzdar sherýi-2026»: elordalyq mektepte úzdik oqýshylar marapattaldy
ASTANA. KAZINFORM — Elordalyq № 36 orta mektepte úzdik oqýshylardyń, pedagogter men ata-analardyń basyn qosqan «Juldyzdar sherýi-2026» saltanatty rásimi ótti, dep habarlaıdy Astana ákimdiginiń resmı saıty.
Іs-shara barysynda oqý jyly boıy oqýda, qoǵamdyq jumystarda jáne shyǵarmashylyq jobalarda joǵary nátıjeler kórsetken 9-10 synyp oqýshylaryna qalalyq kolledjderde bilim alýǵa arnalǵan granttyq sertıfıkattar tabys etildi.
Uıymdastyrýshylar «Juldyzdar sherýi» rásimi jyl qorytyndysyn shyǵaratyn dástúrli shara ǵana emes, sonymen qatar óskeleń urpaqtyń tulǵalyq damýyna, bastamashylyǵyn qoldaýǵa jáne belsendi azamattyq pozıtsııasyn qalyptastyrýǵa baǵyttalǵan mektep mádenıetiniń mańyzdy bóligine aınalǵanyn atap ótti.
Oqý jyly ishinde mektep oqýshylary ıntellektýaldyq konkýrstarǵa, pándik olımpıadalarǵa, ǵylymı-zertteý konferentsııalaryna jáne shyǵarmashylyq festıvalderge belsendi qatysty. Kóptegen bala qaıyrymdylyq pen eriktiler bastamalarynda ózin kórsete bildi, qalalyq jáne respýblıkalyq jobalarǵa qatysyp, joǵary jaýapkershilik pen áleýmettik belsendilik deńgeıin pash etti.
— Keshtiń eń mańyzdy sáti — mekteptiń 15 úzdik oqýshysyna granttyq sertıfıkattar tapsyrý rásimi boldy. Iemdengen sertıfıkattar elorda kolledjderinde bilim alýdy jalǵastyrýǵa múmkindik beredi jáne balalar úshin jańa bilim berý perspektıvalaryn ashady. Oqýshylar úshin bul bolashaq mamandyqqa jáne tulǵalyq qalyptasýǵa jasalǵan alǵashqy mańyzdy qadam boldy, — delingen habarlamada.
Rásimdi uıymdastyrýshylar talantty ári maqsatty mektep oqýshylaryn qoldaý qazirgi bilim berý júıesiniń eń mańyzdy mindetteriniń biri ekenin basa aıtty.
Buǵan deıin elordalyq jas túlekter LRT-da «Aq bantık» ánin shyrqaǵanyn jazdyq.
