«Juldyzaı-2024»: Astanada ulttyq ınklıýzıvti oıyndar ótip jatyr
ASTANA. KAZINFORM - Astanada múmkindigi shekteýli balalar men jasóspirimderdi qoldaý maqsatynda elimizde jyl saıyn uıymdastyrylatyn «Juldyzaı» respýblıkalyq ulttyq ınklıýzıvti oıyndary ótip jatyr, dep habarlaıdy elorda ákimdiginiń resmı saıty.
Bıylǵy is-shara 3-5 qazan aralyǵynda J.Úshkempirov atyndaǵy Jekpe-jek caraıy, «Qazaqstan» jeńil atletıka sport kesheni, «Sairan Arena» sport klýby jáne Paralımpıada jattyǵý ortalyǵy ǵımarattarynda ótkiziledi.
Básekege 10-16 jastaǵy múmkindigi shekteýli balalar men jasóspirimder qatysyp, jeńil atletıka, golbol, mını-fýtbol, ústel tennısi, ulttyq oıyn túrleri: bes tas, asyq atý jáne toǵyzqumalaq sııaqty sporttyń jeti túrinen synǵa túsedi.
Jarysqa Astana, Almaty, Shymkent qalalary, Abaı, Aqmola, Atyraý, BQO, Aqtóbe, Jambyl, Jetisý, Qaraǵandy, Qostanaı, Qyzylorda, Mańǵystaý, Pavlodar, SQO, ShQO, Túrkistan, Ulytaý oblystarynan 600-ge jýyq qatysýshy bas qosty.
Osy oraıda saltanatty is-sharanyń ashylýyna paradzıýdodan Parıj Paralımpıadasynyń kúmis júldegeri, elordalyq sportshy Erǵalı Shámeı arnaıy qatysty.
«Sońymnan erip kele jatqan ini-qaryndastaryma sáttilik tileımin! Ózim osy paradzıýdoda úlken jetistikterge jettim. Áli de toqtap qalmaımyn. Sizder de biz sekildi qazaqtyń kók týyn abyroımen asqaqtatyn bolasyzdar. Bizden de asyp túsýge tilektespin. Sol úshin tynymsyz eńbek etip, úmitterińizdi eshqashan úzbeńizder. Osynda kelip otyrǵan qadamdaryńyzdyń ózi úlken jeńis. Barlyǵyńyzǵa sáttilik tileımin!» – dedi Erǵalı Shámeı.
Respýbıkalyq dodaǵa qatysý úshin 2024 jyldyń sáýir-maýsym aılarynda elimizdiń barlyq óńirinde qazylar alqasynyń qatysýymen irikteý kezeńi ótkizilgen bolatyn.
Aıta keteıik, aýqymdy is-shara 2016 jyldan beri turaqty túrde uıymdastyrylyp keledi.
