Juldyz Súleımenova: JI-di bilim berý júıesine engizý deńgeıin baǵalaıtyn ulttyq qural daıyndalyp jatyr
ASTANA. KAZINFORM — Qazaqstanda Memleket basshysy Qasym-Jomart Toqaevtyń bilim berý júıesindegi tsıfrlyq transformatsııany kúsheıtý jónindegi tapsyrmasyna sáıkes keshendi bastamalar iske asyrylyp jatyr. Bul týraly Oqý-aǵartý mınıstri Juldyz Súleımenova aıtty.
Mınıstrdiń aıtýynsha, oqý protsesine tsıfrlyq sheshimderdi engizý úsh negizgi baǵytta júrgizilip otyr. Osy maqsatta vedomstvo Jasandy ıntellekt jáne tsıfrlyq damý mınıstrligimen birlesip 2025–2029 jyldarǵa arnalǵan bilim berý júıesine jasandy ıntellektini engizýdiń tujyrymdamalyq negizderin bekitti.
— Mınıstrlik bilim mazmunynyń sapasyn qamtamasyz etýge jáne ony saraptamadan ótkizýge basymdyq beredi, — dedi Juldyz Súleımenova.
Buǵan qosa, oqytýdy derbestendirýge baǵyttalǵan «AI Kitap» platformasy iske qosylyp, «Day of AI» onlaın-ádistemelik kesheni ázirlendi. Jasandy ıntellektti qaýipsiz ári ádil qoldaný maqsatynda etıkalyq standarttar bekitildi.
— Pedagogterdiń jasandy ıntellektini tıimdi qoldaný biliktiligin arttyrý úshin «Acquire → Deepen → Create» úsh deńgeıli oqytý júıesi iske qosyldy. Qazirdiń ózinde ıÝNESKO baǵdarlamasy negizinde ázirlengen «Acquire» deńgeıindegi onlaın kýrsynan 200 myńnan astam muǵalim ótti. Al joǵary deńgeıdegi oqytýǵa 15 myńnan astam ınformatıka páni muǵalimi qatysady, olardyń jartysynan kóbi — aýyl ustazdary, — dedi mınıstr.
Qazirgi tańda mınıstrlikpen jasandy ıntellektti bilim berý júıesine engizý deńgeıin baǵalaıtyn ulttyq qural daıyndalyp jatyr. Bul bastama PISA–2029 halyqaralyq zertteýine daıyndyqtyń bir bóligi bolyp tabylady. Atalǵan tsıklde alǵash ret jasandy ıntellekt saýattylyǵy baǵalanbaq.
Mınıstr sondaı-aq ınformatıka, robototehnıka jáne jasandy ıntellekt baǵyttarynda daryndy balalardy anyqtaý men qoldaýǵa erekshe nazar aýdarylatynyn aıtty.
Sonymen qatar, pedagogterdiń biliktiligin arttyrýǵa arnalǵan 56 baǵdarlamaǵa «Oqýshylardyń fýnktsıonaldyq saýattylyǵyn arttyrý úshin tsıfrlyq tehnologııalardy paıdalaný» atty jańa modýl engizildi.
Eske sala keteıik, buǵan deıin Oqý-aǵartý mınıstri bilim salasyndaǵy jańa basymdyqtardy ataǵan bolatyn.