Juldyz Súleımenova jańa oqý jylynyń basty ereksheligin atady
ASTANA. KAZINFORM — 2029 jyly shaǵyn jınaqty barlyq mektepte bilim sapasy alshaqtyǵyn azaıtatyn joba engiziledi. Bul týraly Úkimet otyrysynda Oqý-aǵartý mınıstri Juldyz Súleımenova aıtty.
— Jańa oqý jylynyń ereksheligi — jasandy ıntellektini orta bilim berý júıesine engizý. Osy maqsatta «Tsıfrlyq saýattylyq» jáne «Informatıka» pánderiniń ataýy ózgertildi. Bıyl 12 mamyrda Memleket basshysynyń «Qazaqstan Respýblıkasynyń orta bilim berý júıesine jasandy ıntellektini engizý jónindegi sharalar týraly» Jarlyǵy qabyldandy. Qazirgi ýaqytta mınıstrlik múddeli memlekettik organdarmen birlesip, atalǵan Jarlyqty iske asyrý jónindegi 2026–2029 jyldarǵa arnalǵan keshendi jospardy ázirledi, — dedi ol.
Mınıstrdiń aıtýynsha, 1 qyrkúıekten bastap Pavlodar jáne Qyzylorda oblystaryndaǵy 10 shaǵyn jınaqty mektepte jasandy ıntellekt tehnologııalaryn qoldana otyryp qala men aýyl arasyndaǵy bilim sapasynyń alshaqtyǵyn azaıtý maqsatynda pılottyq joba iske qosylady.
— Jalpy, pılottyq kezeńde joba 500 shaǵyn jınaqty mektepti qamtıdy. Joba 2029 jylǵa deıin barlyq 2 600 shaǵyn jınaqty mektepke masshtabtalady, — dedi Juldyz Súleımenova.
Buǵan deıin jańa oqý jylynda oqýshylar qandaı kýrstardy mindetti túrde oqıtynyn jazǵan edik.
