Juldyz Súleımenova pedagogterdiń biliktiligin baǵalaý testin kimder tapsyratynyn aıtty
ASTANA. KAZINFORM – Atalǵan test alynyp tastaldy. Degenmen, keı mamandar áli de tapsyrady. Bul jóninde Oqý-aǵartý mınıstri Instagram paraqshasynda bólisti.
– Bul ýaqytsha toqtatý emes. Pedagogıkalyq qoǵamdastyqta jumys istep júrgen qyzmetkerler pándik biliktilik testin tapsyrmaıdy. Bul testini alyp tastadyq. Biraq bul testini kimder tapsyrady? Pedagog mamandyǵyna eń alǵash qadam basyp jatqan ýnıversıtet túlekteri tapsyrady. Óıtkeni olar salaǵa endi ǵana kelip jatyr. Olardyń bilim deńgeıin bilýimiz qajet, – dedi ol.
Sondaı-aq jas mamandar bul testiden eki jyldan keıin qaıtadan ótýi tıis.
– Osy jańa ustazdar eki jyldan keıin pedagog-moderator biliktilik deńgeıine, ıaǵnı attestatsııaǵa qadam basqanda, pedagog biliktiliginiń testin tapsyrady. Basqa jaǵdaıda kategorııaǵa, attestatsııaǵa tapsyratyn birde-bir ustaz bul testileýden ótýge mindettelmeıdi. Pedagog biliktiligi testiniń attestatsııaǵa eshqandaı baılanysy bolmaıdy, – dedi mınıstr.
Al bul jańalyq jarııalanǵansha testileýden ótýdi bastap qoıǵandar ony sońyna deıin aıaqtaıdy.
– Buǵan deıin 51 myń pedagog tapsyryp, shekti balyn jınaǵan eken. Olar shekti balyn jınap, búkil portfolıosyn jınaqtap, attestatsııadaǵy qazir kórsetilip turǵan kezeńderdi tapsyrady. Ótkenderi qyrkúıekten bastap qosymsha ústemeaqysyn alady, – dedi Juldyz Súleımenova.
Aıta keteıik buǵan deıin muǵalimderdiń pándik bilimin baǵalaý testi toqtatylatynyn jazǵanbyz.
