Qazaqstanda 15 myńnan astam shetel azamaty jumys isteıdi
ASTANA. KAZINFORM — 2025 jylǵy 1 qyrkúıektegi jaǵdaı boıynsha jergilikti atqarýshy organdardyń ruqsatymen Qazaqstan aýmaǵynda 15 054 shetel azamaty eńbek etedi. Bul týraly Eńbek jáne halyqty áleýmettik qorǵaý mınıstrligi málim etti.
Shetel jumys kúshin tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 561 ruqsat (birinshi sanat), qurylymdyq bólimshelerdiń basshylary úshin 2 348 ruqsat (ekinshi sanat). Tartylǵan shetel jumys kúshin negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady — tıisinshe olar 3 980 jáne 1 052 adam. Sondaı-aq maýsymdyq jumystarǵa 3 099 adam, al korporatıvtik aýystyrý aıasynda 4 015 adam tartyldy.
— Qazirgi ýaqytta Qazaqstanda shetel jumys kúshin paıdalanatyn 1 909 jumys berýshi bar. Olarda 341 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96%-y. Ekonomıkalyq qyzmet túrleri boıynsha eń kóp jumys isteıtinder: qurylys salasynda — 4 929 adam, aýyl, orman jáne balyq sharýashylyǵy — 3 140 adam, taý-ken ónerkásibi jáne karerlerdi qazý — 1 240 adam, óńdeý ónerkásibi — 1 122 adam, — delingen habarlamada.
Eńbek mıgranttary keletin negizgi elder: Qytaı — 5 545 adam, Ózbekstan — 2 696 adam, Túrkııa — 1 076 adam, Úndistan — 1 052 adam.
Іshki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıtinin jáne bóletinin esterińizge salamyz. 2025 jyly jalpy kvota respýblıkadaǵy jumys kúshiniń sanyna qatysty 0,2% mólsherinde nemese 14,8 myń birlik bolyp belgilengen, al osy jyldyń naýryz aıynan bastap jergilikti atqarýshy organdardyń ótinimderine baılanysty mınıstrdiń buıryǵymen 16,5 myń birlikke deıin ulǵaıtyldy.
Aǵymdaǵy jyldyń tamyz aıynan bastap maýsymdyq sheteldik jumysshylardyń eńbek qyzmetin júzege asyrý úshin kásipter tizbesiniń keńeıýine baılanysty mınıstrdiń buıryǵymen jalpy kvota respýblıkadaǵy jumys kúshi sanyna qatysty 0,25% nemese 19,4 myń birlik mólsherinde belgilendi.
Aıta keteıik, Enbek.kz portalynda jasandy ıntellekt 50 myńnan astam bos jumys ornyn usyndy.