Juldyz Súleımenova: Muǵalim mártebesin qorǵaý — vedomstvonyń strategııalyq basymdyǵy
ASTANA. KAZINFORM — Oqý-aǵartý mınıstri Juldyz Súleımenova «Muǵalim mártebesin qorǵaý jáne bala qaýipsizdigin qamtamasyz etý — vedomstvonyń strategııalyq basymdyǵy» ekenin aıtty. Bul týraly vedomstvonyń baspasóz qyzmeti málim etti.
Juldyz Súleımenova azamattardy jeke máseleleri boıynsha qabyldap, bilim salasyndaǵy ózekti quqyqtyq jáne áleýmettik saýaldarǵa jaýap berdi. Onlaın jáne oflaın formatta ótken qabyldaýǵa pedagogter, zańgerler men qoǵamdyq ınstıtýttardyń ókilderi qatysty.
Sala mınıstri bilim berý júıesin tolyq tsıfrlandyrý — sybaılas jemqorlyq táýekelderin joıýdyń jáne sheshim qabyldaý úderisiniń obektıvtiligin qamtamasyz etýdiń kepili ekenin atap ótti.
Qujat qabyldaý isin birtindep tsıfrlyq formatqa kóshirý adam faktoryn azaıtyp, merıtokratııa qaǵıdatyn nyǵaıtýǵa múmkindik beredi.
Eske sala keteıik, buǵan deıin mınıstr jergilikti jerlerdegi basqarý etıkasy men pedagogterdiń eńbek quqyǵynyń saqtalýy boıynsha másele kótergen edi. Keıbir óńirlerdegi mektep basshylary tarapynan bolǵan ákimshilik ozbyrlyq pen zańsyz jumystan shettetý derekterine qatysty Mınıstr qatań ustanym bildirgen bolatyn.
Vedomsvo basshysy pedagogtiń quqyǵyn aıaqqa taptaıtyn kez kelgen bıýrokratııalyq kedergi men jergilikti jerdegi qysymǵa negizdelgen basqarý ádisterine mınıstrlik tarapynan tosqaýyl qoıylatynyn aıtqan edi. Ol árbir zańsyz shettetilgen maman boıynsha tekserý júrgizilip, ádilettilik qalpyna keltiriletinin, ár muǵalimniń taǵdyry – memlekettik mańyzy bar másele ekenin qadap aıtqan bolatyn.