Juldyz Súleımenova mınıstrlikke qandaı komandamen kelgenin aıtty
ASTANA. KAZINFORM – Oqý-aǵartý mınıstri Juldyz Súleımenova Úkimet otyrysynan keıin ótken baspasóz máslıhatynda vedomstvodaǵy aýys-túıis daýyna pikir bildirdi.
- Qyzmetińizge kiriskennen bastap burynǵy mamandardy jumystan alyp jatqanyńyz týraly aqparat kóp. Mysaly, 1 jeltoqsanda Ybyraı Altynsarın atyndaǵy akademııa prezıdenti Názıpa Aıýbaeva laýazymynan bosatyldy. Mamyr aıynyń aıaǵynda ǵana taǵaıyndalǵan bolatyn. Osyndaı rotatsııalardyń sebebin túsindire alasyz ba? Osyndaı jolmen sizge deıin bolǵan mınıstrdiń adamdaryn alastap jatyrsyz ba, - dep surady BAQ ókili.
Juldyz Súleımenova Názıpa Aıýbaevanyń qyzmetten óz erkimen ketkenin atap ótti.
- Ybyraı Altynsarın atyndaǵy ulttyq bilim akademııasynyń prezıdenti óziniń sheshimimen ketti. Buǵan deıin aıtqanymdaı, pánderdi biriktirý reformasyn toqtattyq. Ol sheshimge atalǵan akademııa prezıdenti kónbedi jáne qabyldanǵan sheshimniń ózgermeýine baılanysty ózi osyndaı sheshim qabyldady.
Negizi meniń óz komandam joq. Tek kómekshimmen jáne keńesshimmen keldim. Nebári bes adammen. Qazirgi ishki kadrlyq ózgeristerdiń bári buǵan deıin bir orynda 20 jyl, 30 jyl jumys istegen. Osy derekter dáleldengen jaǵdaıda ornyna adamdar merıtokratııa qaǵıdaty boıynsha taǵaıyndalyp jatyr. Iá, keıbir kadrlar ózderi sheshim qabyldap ketip jatyr. Endi oǵan men eshqandaı toqtaý qoıa almaımyn, - dedi mınıstr.
Onyń aıtýnysha, óz erkimen jumystan ketken 45 adam bar.
- Eki vedomstvolyq baǵynysty uıymnyń basshysynan bólek apparat jetekshisi jáne orta bilim komıteti tóraǵasynyń orynbasary ketti. Qalǵan mamannyń bári jumys istep jatyr. Sondyqtan mamandar aǵynynyń úlken bir tolqynyn kórip otyrǵan joqpyn. Biraq meniń aldymda qysqa ýaqyttyń ishinde bilim sapasyn arttyrý, jeke menshik mektepterdi qarjylandyrý sııaqty problemalardy sheshý mindeti tur. Ol mindetterdi oryndaý úshin bilikti, kásibı mamandar qajet. Mınıstrliktiń ishindegi osyndaı mamandardy izdep jatyrmyn. Kórgen boıda kótermelep, jaqsy qyzmetterge taǵaıyndaýdy bastap kettim, - dedi Juldyz Súleımenova.
Sondaı-aq, ol pánderdi biriktirý reformasy nege toqtaǵanyn aıtty.