Juldyz Súleımenova «Qazaqstan balalary» tujyrymdamasyn tanystyrdy

ASTANA. KAZINFORM — Búgin Úkimet otyrysynda Oqý-aǵartý mınıstri Juldyz Súleımenova «Qazaqstan balalary» tujyrymdamasyn tanystyrdy.

- Prezıdentimizdiń Ulttyq quryltaı aıasynda bergen tapsyrmalary aıasynda balalardyń qaýipsizdigin kúsheıtýge baǵyttalǵan naqty sharalar qabyldanyp, olardyń quqyqtaryn qorǵaý baǵytynda júıeli jumystar atqarylyp jatyr. Atap aıtqanda, Prezıdent bastamasymen balalardyń quqyǵyn qorǵaý, bilim berý sapasyn arttyrý, densaýlyǵyn saqtaý, áleýmettik qoldaý jáne qaýipsizdigin qamtamasyz etý salasynda aıtarlyqtaı irgeli reformalar men zańdar qabyldanyp, júzege asyrylyp jatyr. ıÝNISEF aımaqtyq dırektory Qazaqstanda balalar quqyqtaryn qorǵaý salasynda tek Ortalyq Azııa aımaǵy elderi úshin ǵana emes, sonymen birge birqatar Eýropalyq elder úshin de úlgi ekenin aıtqan bolatyn. Memleket basshysynyń tapsyrmasy aıasynda Oqý-aǵartý mınıstrligi, Balalardyń quqyqtary jónindegi ýákil jáne salalyq mınıstrler birlesip, 2026-2030 jyldarǵa arnalǵan «Qazaqstan balalary» tujyrymdamasyn ázirledi, - dedi mınıstr.

Onyń dereginshe, 2025 jylǵy statıstıka boıynsha elimizde 7 mıllıonǵa jýyq bala bar. Bul jalpy halyq sanynyń 34 paıyzy. Sońǵy 10 jylda turaqty demografııalyq damý negizinde balalar sany 1,5 mıllıonǵa artqan.

- Prezıdent bastamasymen «Ulttyq qor – balalarǵa» baǵdarlamasy júzege asyrylyp keledi. Qazaqstan Respýblıkasy Ulttyq qorynyń ınvestıtsııalyq tabysynyń 50 paıyzy 18 jasqa deıingi barlyq balanyń shotyna aýdarady. Jınaqtalǵan qarajat oqý aqysyn tóleýge jáne turǵyn úı jaǵdaıyn jaqsartýǵa arnalǵan. Sonymen qatar «Qazaqstan halqyna» qoǵamdyq qorynyń jumysy aıasynda 120-ǵa jýyq áleýmettik joba júzege asyryldy, - dedi Juldyz Súleımenova.

Aıta keteıik, búgin Úkimet «Qazaqstan balalary» tujyrymdamasyn pysyqtady.