Juldyz Súleımenova qarapaıym eńbek adamdarynyń jalaqysyna qatysty másele kóterdi
ASTANA. KAZINORM – Bilim berý, densaýlyq saqtaý mekemelerindegi orta jáne kishi býyn mamandary men qyzmetshilerdiń eńbekaqysyn keminde eki esege kóterý qajet. Bul týraly Májilistiń jalpy otyrysynda Úkimet basshysynyń orynbasary Tamara Dúısenovaǵa saýal joldaǵan depýtat Juldyz Súleımenova aıtty.
«Memleket basshysy Qasym-Jomart Kemeluly Toqaevtyń «Biz qarapaıym eńbek adamyna qurmet kórsetýimiz kerek» degen sózderinen eńbek adamynyń zańdy quqyqtaryn qorǵaý, áleýmettik qoldaý, ómir sapasyn jaqsartý arqyly áleýmettik ádilettilikti qalyptastyrý mindetteri aıqyndalady. Jyl saıyn Úkimet tarapynan azamattyq qyzmetshilerdiń jalaqysynda biliktilik sanattaryna qoldanylatyn koeffıtsıentterdi arttyrý qarastyrylyp, jalaqylary ósip keledi. Ókinishtisi sol, mekemelerdiń qyzmetin eden jýýshy, aýla tazalaýshy, santehnık, plotnık, elektrık sekildi qarapaıym eńbek adamdarynyń kúndelikti aýyr jumystarynsyz júzege asyrý múmkin emes bolsa da, búginde osy atalǵan jumysshylar azamattyq qyzmetshiler reestrinde joq. Sondyqtan, Úkimet tarapynan azamattyq qyzmetshiniń aılyǵyn arttyrǵanda osy eńbegi aýyr jumysshylardyń múddesi eskerilmeı keledi», - dedi Májilis depýtaty.
Onyń dereginshe, densaýlyq saqtaý, oqý-aǵartý salasyndaǵy eń aýyr jumystardy atqaratyn jumysshylardyń aılyq jalaqysy tómen. Mysaly, mektepterdegi eden jýýshy – 82 856 teńge, elektrık - 81 575 teńge, aýla sypyrýshy 79 317 teńge jalaqy alady. Búgingi tańda tek orta bilim salasynda 261 myńnan astam osy sanattaǵy jumysshy bar. Olardyń 254 myńynyń qolyna tıetin aılyq jalaqysy 74 myń teńgeden 85 myń teńge aralyǵynda ǵana.
«Bilim berý, densaýlyq saqtaý mekemelerindegi orta jáne kishi býyn mamandary men qyzmetshilerdiń eńbekaqysyn keminde eki esege kóterý qajet dep sanaımyz. Atqaratyn jumysynyń kúrdeliligine jáne aýyrlyǵyna ári ereksheligine qaraı laıyqty jalaqy taǵaıyndalýy tıis dep esepteımiz. Sebebi, jalaqy áleýmettik jaǵdaıdy, kúnkóris deńgeıin, densaýlyǵyna jáne balalaryn ósip-jetildirýge jetkilikti bolýy shart. Áleýmettik ádildik zamanynda jumysy aýyr, eńbegi adal jumysshylardyń jalaqysy artýy qajet. Halqymyzda «Eńbek adamy – eldiń quty» degen jaqsy sóz bar. «AMANAT» partııasynyń fraktsııasy qarapaıym eńbek adamdaryna sanatyndaǵy jumysshylarǵa laıyqty jalaqy tóleýdiń shyn máninde ádil ári biryńǵaı júıesin qurý jóninde vedomstvoaralyq jumys tobynyń jasaqtalýy kezek kúttirmeıtin másele dep bilemiz», - dedi Juldyz Súleımenova.
Osyǵan oraı Májilis depýtaty «AMANAT» partııasy fraktsııasynyń atynan mynadaı usynystar engizdi:
1. Oqý-aǵartý mınıstrligi 2016 jyldyń 29 qańtaryndaǵy Qazaqstan Respýblıkasy Bilim jáne ǵylym mınıstriniń № 123 buıryǵymen bekitilgen Bilim jáne ǵylym salasyndaǵy azamattyq qyzmetshiler laýazymdarynyń tizilimin qaıta qarap, eden jýýshy, plotnık, santehnık, aýla tazalaýshy, elektrık sanatyndaǵy jumysshylardyń osy tizilimge engizilýin qarastyrsyn.
2. Oqý-aǵartý mınıstrligi Ulttyq ekonomıka mınıstrligimen birlese otyryp, respýblıkalyq bıýdjetti naqtylaý kezeńinde atalǵan jumysshylardyń bazalyq laýazymdyq jalaqysyn ınflıatsııaǵa jáne jumystardyń kúrdeliligine sáıkes ulǵaıtýdy qarastyrsyn.
3. Oqý-aǵartý mınıstrligi Qarjy mınıstrligimen birlese otyryp, eden jýýshy, plotnık, santehnık, aýla tazalaýshy, elektrık sanatyndaǵy jumysshylardyń eńbek demalysyna tólenetin tólem mólsherine saýyqtyrý járdemaqysyn qosý múmkindigin qarastyryp, respýblıkalyq bıýdjetten shyǵyndaryn eseptesin.
