Juldyz Súleımenova: bizdiń mindet – ozyq oıly urpaq tárbıeleý

ASTANA. KAZINFORM — Oqý-aǵartý mınıstri Juldyz Súleımenova qazaqstandyq ustazdardy kásibı merekemen quttyqtady.

— Qurmetti ustazdar, qadirli áriptester! Sizderdi Ustazdar kúnimen shyn júrekten quttyqtaımyn Aǵartýshy-pedagog Y.Altynsarınniń «Maǵan jaqsy muǵalim bárinen de qymbat, óıtkeni muǵalim — mekteptiń júregi» degen sózi muǵalimniń el bolashaǵynyń irgetasyn qalaýshy retinde mańyzdy rólin dáleldeı túsedi. Bizdiń mindet — bilimdi, adal, jahandyq básekege qabiletti, ozyq oıly urpaq tárbıeleý arqyly el bolashaǵynyń senimdi ári sapaly negizin qalaý, — dedi Juldyz Súleımenova.

Muǵalimniń jaı ǵana mamandyq ıesi emes, qoǵamnyń ozyq tulǵasy retinde bedelin bıiktetken Memleket basshysy Qasym-Jomart Kemeluly Toqaev ustazdy qoǵamnyń basty keıipkeri etý — memlekettik saıasattyń basym baǵyty dep aıqyndaǵan bolatyn.

— Memleket basshysy muǵalimderdiń quqyqtyq mártebesin odan ári nyǵaıtýdy tapsyryp, birneshe mindetter júktedi. Osyǵan baılanysty biz Parlament Májilisimen birge zańnamalyq ózgeristerdi júzege asyratyn bolamyz jáne osy joly da ustazdar qoǵamdastyǵymen mindetti túrde aqyldasatyndyǵymyzdy da atap ótkim keledi. Balalarymyzǵa sapaly bilimmen qatar, sanaly tárbıe berý de pedagogıkalyq qaýymdastyqqa júktelgen asa mańyzdy mindet. Oǵan memleket pen mekteppen qatar, ata-analardyń da atsalysýy ózekti. Qurmetti ustazdar, barshańyzǵa kelip jetken ustazdar merekesi qutty bolsyn! Óskeleń urpaqty tárbıeleýdegi ónegeli eńbekterińiz jemisti bolsyn, — dedi mınıstr. 

Aıta ketelik búgin elimizde dúnıedegi eń asyl, jaýapty ári mańyzdy mamandyq ókilderi – muǵalimder kúni. Bul kún elimizde biraz ýaqytqa deıin qazan aıynyń birinshi jeksenbisinde atalyp ótip keldi. Al 2023 jyly Úkimet qaýlysymen 5 qazanǵa bekitilgen edi.