Juldyz Súleımenova bilim salasyndaǵy jańa basymdyqtardy atady
ASTANA. KAZINFORM — Astana qalasynda ótken Ustazdar kúnine arnalǵan saltanatty is-sharaǵa Oqý-aǵartý mınıstri Juldyz Súleımenova, Qazaqstan Respýblıkasynyń Parlamenti depýtattary, ÚEU ókilderi, bilim berý uıymdarynyń basshylary, óńirlerden kelgen úzdik ustazdar men ardagerler qatysty.
Ustazdardy kásibı merekesimen quttyqtaǵan mınıstr Memleket basshysy Qasym-Jomart Kemeluly Toqaev bilim salasyn jan-jaqty damytýǵa basymdyq berip otyrǵanyn atap ótti. Búginde elimizde osy maqsatta bilim berý uıymdarynyń ınfraqurylymyn jańǵyrtýmen qatar, ustazdardyń kásibı bedelin arttyrýǵa, áleýmettik qoldaýǵa baǵyttalǵan mańyzdy qadamdar jasalyp jatyr.
— Ustaz — jas urpaqtyń dúnıetanymyn qalyptastyratyn, ómirge degen kózqarasyn aıqyndaıtyn tulǵa. Olar jas urpaqty úzdiksiz oqýǵa, ózin-ózi damytýǵa baǵyttaıdy, bolashaqqa senimmen qadam basýyna jol silteıdi. Sondyqtan ustazdardyń eńbegi laıyqty baǵalanyp, olarǵa únemi qurmet kórsetilip keledi, — dedi mınıstr Juldyz Súleımenova.
Mınıstr sonymen birge óskeleń urpaqqa sapaly bilim jáne tárbıe jumysynda ustazdarmen, ata-analarmen yntymaqtastyqta jumys júrgiziletinin atap ótti. Búginde oqý-aǵartý salasynyń aldynda jahandaný kóshimen birge kelgen ınnovatsııalyq tolqyndar, jasandy ıntellekt tehnologııalaryn bilim berý úderisine tıimdi engizý mindeti tur. Juldyz Súleımenova osy turǵyda pedagogıkalyq qoǵamdastyqpen birqatar ustanymdarymen bólisti.
— Birinshiden, mektepte sapaly, qoldanbaly bilim berilýi tıis. «Zań men tártip» qaǵıdasy men «Taza Qazaqstan» tujyrymdamasynyń sapaly oryndalýyna erekshe mán beretin bolamyz. Ustazdarmen forýmda Memleket basshysy Qasym-Jomart Toqaev aıtqan jasandy ıntellekt tehnologııalaryn engizý erekshe bilim alý qajettilikteri bar balalardy jan-jaqty qoldaý úshin óte ózekti. Ekinshiden, bilim júıesi aıasynda oqýshylardyń adamgershilik men moraldyq kelbetin qalyptastyrýdyń «Adal azamat» birtutas tárbıelik baǵdarlamasyn mazmundy júzege asyrýdy ary qaraı jalǵastyramyz. Úshinshiden jáne eń bastysy, muǵalimniń biliktiligin úzdiksiz arttyrý jáne olardyń shyǵarmashylyq jumysyna jaǵdaı jasaý basty basymdyǵymyz bolady, — dedi mınıstr.
Sonymen qatar, mınıstr muǵalimderge oqý úderisine qatysy joq qosymsha sharalar men artyq jumystar júktelmeýi tıis ekenin basa aıtty. Juldyz Súleımenova kásibı jetistikterge jetken jáne oqýshylary joǵary nátıje kórsetken pedagogterdi «Qurmet» ordenimen, «Eren eńbegi úshin», «Shapaǵat» medaldarymen jáne «Qazaqstannyń eńbek sińirgen ustazy» memlekettik nagradalarymen marapattady.
Aıta ketelik Oqý-aǵartý mınıstri Juldyz Súleımenova qazaqstandyq ustazdardy kásibı merekemen quttyqtaǵan edi.