Juldyz Súleımenova: Bilim salasyndaǵy reformanyń ólshemi – ustazdyń abyroıy men quqyqtyq qorǵalýy
ASTANA. KAZINFORM – Qazaqstan Respýblıkasynyń Oqý-aǵartý mınıstri Juldyz Súleımenova azamattardy jeke máseleleri boıynsha qabyldady. Mınıstr óńirlerden kelgen ustazdardyń, sala ardagerleri men IT salasy mamandarynyń usynystaryn tyńdady. Bul týraly Oqý-aǵartý mınıstrliginiń baspasóz qyzmeti habarlady.
Mınıstr qabyldaýyndaǵy eń mańyzdy taqyryp jergilikti jerlerdegi basqarý etıkasy men pedagogterdiń eńbek quqyǵynyń saqtalýy boldy. Keıbir óńirlerdegi mektep basshylary tarapynan bolǵan ákimshilik ozbyrlyq pen zańsyz jumystan shettetý derekterine qatysty Mınıstr qatań ustanym bildirdi.
– Ustazdyń qadiri qashqan jerde – ulttyń bolashaǵy bulyńǵyr. Biz mektep dırektorlaryn tek menedjer emes, ujymnyń rýhanı temirqazyǵy retinde kóremiz. Pedagogtiń quqyǵyn aıaqqa taptaıtyn kez kelgen bıýrokratııalyq kedergi men jergilikti jerdegi qysymǵa negizdelgen basqarý ádisterine mınıstrlik tarapynan tosqaýyl qoıylady. Árbir zańsyz shettetilgen maman boıynsha tekserý júrgizilip, ádilettilik qalpyna keltiriledi. Biz úshin ár muǵalimniń taǵdyry – memlekettik mańyzy bar másele, - dep málimdedi Juldyz Súleımenova.
Kezdesýde Shyǵys Qazaqstan oblysy, Zaısan qalasynan kelgen ardager ustazdyń bastamasymen shaǵyn shaharda zamanaýı shyǵarmashylyq ortalyq salý máselesi kóterildi. Sala mınıstri ardagerdiń bul ótinishin maquldady jáne máseleniń bir kúnde sheshilmeıtinin, josparly protsedýralardyń birneshe jylǵa sozylýy múmkin ekenin aıtty. Memleket basshysy Qasym-Jomart Toqaevtyń tapsyrmasymen ashylǵan «Keleshek mektepteri» ulttyq jobasy aıasynda ınfraqurylymdy damytýmen qatar, balalardyń qosymsha bilimine ınvestıtsııa salý – basty strategııalyq mindetke aınalyp otyrǵanyn atap ótti.
Sonymen qatar qoǵamdyq kelisim men teń múmkindikterdi qamtamasyz etý maqsatynda ınklıýzıvti kommýnıkatsııany damytý baǵytynda usynys aıta kelgen ustazdar da boldy. Olar múmkindigi shekteýli jandarmen jumys isteıtin pedagogterge arnalǵan arnaıy kýrstardy engizýdi, erekshe balalarmen jumys isteıtin pedagogterdiń biliktiligin arttyrý baǵdarlamasyn engizýdi surady.
Juldyz Dosbergenqyzy erekshe bala tárbıelep otyrǵan azamattarǵa jýyrda tanystyrylǵan «Qazaqstan balalary» tujyrymdamasynyń mánin túsindirdi. Vedomstvoaralyq qujat aıasynda elimizde ınklıýzııa baǵytynda osy sala mamandarynyń biliktiligin arttyrý kózdelip otyrǵanyn aıtty. Bul joly qabyldaýda bolǵan belsendi azamattardy mınıstrlik janyndaǵy Qoǵamdyq keńes quramyna tartý týraly sheshim qabyldandy.
Qabyldaýǵa kelgen IT-sektor ókilderi bilim berý protsesine jasandy ıntellekt tetikterin engizý máselesin kóterdi, ázirlemelerin tanystyrýǵa nıet bildirdi. Mınıstr ınnovatsııalyq sheshimderdiń muǵalimniń júktemesin azaıtýǵa jáne bilim sapasyn obektıvti baǵalaýǵa baǵyttalýy tıis ekenin qadap aıtty. Bul baǵyttaǵy usynystar tıisti qurylymdar tarapynan zerdelenetin bolady.
Oqýlyqtar men ádistemelik quraldardyń sapasyna qatysty syn aıtyp, óz oqýlyqtaryn, kómekshi quraldaryn respýblıka aýmaǵynda taratýdy suraı kelgen pedagogter de boldy.
Kezdesýde jaýapty qurylym basshylaryna naqty tapsyrmalar berdi.
Buǵan deıin Juldyz Súleımenova mınıstrlikke qandaı komandamen kelgenin aıtqan bolatyn.
