«Juldyz bolǵym keledi» jobasynyń fınalyna 140 tárbıelenýshi ótti
ASTANA. KAZINFORM — «Juldyz bolǵym keledi» II respýblıkalyq shyǵarmashylyq jobasynyń fınalısteri anyqtaldy. Bul týraly Oqý-aǵartý mınıstrliginiń baspasóz qyzmeti málim etti.
Alekseı Lodochnıkovtiń ıdeıasymen júzege asqan jobaǵa Qazaqstan Respýblıkasy Oqý-aǵartý mınıstrligi men «El Umiti» korporatıvtik qory qoldaý kórsetken.
Joba jetim balalar men ata-anasynyń qamqorlyǵynsyz qalǵan balalarǵa arnalǵan uıymdardyń tárbıelenýshilerin qoldaýǵa jáne olardyń shyǵarmashylyq áleýetin ashýǵa baǵyttalǵan.
— Bıyl konkýrs bı janry boıynsha ótkizilip jatyr. Óńirlik irikteý kezeńderinde jetim balalar men ata-anasynyń qamqorlyǵynsyz qalǵan balalarǵa arnalǵan uıymdardyń 370 tárbıelenýshisi óz ónerin kórsetti. Іrikteý qorytyndysy boıynsha 140 úzdik qatysýshy fınalǵa joldama aldy, — delingen habarlamada.
Fınal 2026 jylǵy 29–30 qazanda Astanada ótedi. Eki kún boıy qatysýshylar úlken sahnada óner kórsetip, jobanyń basty júldeleri úshin baq synaıdy.
Konkýrs jeńimpazdaryna júlde qory qarastyrylǵan.
2025 jyly joba alǵash ret vokal janry boıynsha ótkizildi. Sol jyly konkýrsqa balalar úıleriniń 170 tárbıelenýshisi qatysyp, 40 úzdik qatysýshy fınalǵa ótken bolatyn. Jeńimpazdarǵa baǵaly syılyqtar men shetelge shyǵý múmkindigi berildi.
Aıta keteıik, Qazaqstan jastary halyqaralyq Voice Up ınklıýzıvti lagerine qatysyp jatyr.
