Júldegerge grant beretin Prezıdent olımpıadasynyń respýblıkalyq kezeńine 192 oqýshy ótti

ASTANA. QazAqparat - Jaratylystaný-matematıka tsıkli pánderi boıynsha Prezıdent olımpıadasynyń respýblıkalyq kezeńine 192 oqýshy qatysady. Jeńimpazdar Qazaqstan-Brıtan tehnıkalyq ýnıversıteti (9) jáne Q. Jubanov atyndaǵy Aqtóbe óńirlik ýnıversıteti (5) sııaqty ýnıversıtetterde oqýǵa grant alady, dep habarlaıdy QazAqparat.

Olımpıadanyń úshinshi kezeńi 29 qarashadan 2 jeltoqsanǵa deıingi aralyqta akademık E. A. Bóketov atyndaǵy Qaraǵandy ​​ýnıversıtetinde ótedi.

Olımpıadanyń birinshi kezeńine 3 myńǵa jýyq oqýshy qatysty. Balalardyń olımpıadaǵa qatysý kórsetkishi ósip keledi.

Olar matematıka, bıologııa, hımııa jáne fızıka pánderi boıynsha jarysqa tústi.

Baıqaýǵa buryn respýblıkalyq jáne halyqaralyq pán olımpıadalaryna qatyspaǵan 11 (12) synyp oqýshylary qatysa alatynyn eske sala keteıik.

«Olımpıadanyń jeńimpazdary men júldegerleri QR Oqý-aǵartý mınıstrliginiń I, II jáne III dárejeli dıplomdarymen marapattalady jáne grant bólýde basym quqyqqa ıe bolady. Mysaly, byltyr mınıstrliktiń bastamasymen Qazaqstannyń 20 JOO osy olımpıada jeńimpazdaryna 50-ge jýyq grant bóldi. Mınıstrlikke qarasty «Daryn» ortalyǵynyń ókilderi joǵary oqý oryndaryn bilim grantyn bólý bastamasyn qoldaýǵa shaqyrdy. Osylaısha, bıyl Qazaqstan-Brıtan tehnıkalyq ýnıversıteti jeńimpazdarǵa 9 grant, Q. Jubanov atyndaǵy Aqtóbe óńirlik ýnıversıteti 5 grant bóldi», - dedi QR Oqý-aǵartý mınıstrligi orta bilim komıtetiniń tóraǵasy Gúlmıra Kárimova.

Olımpıada jeńimpazdary men júldegerlerin marapattaý rásimi 2 jeltoqsanda ótedi.