Júldeden bas tartqan úndistandyq boksshy qyz sporttan shettetildi
ASTANA. QazAqparat - Halyqaralyq áýesqoı boks federatsııasy (AIBA) Ońtústik Koreıanyń Inchhon qalasynda ótken Azııa oıyndarynda óz júldesin alýdan bas tartqan úndistandyq boksshy qyzdy bir jyl sporttan shektedi. Sonymen qatar, aqshalaı aıyppul saldy.
Áıelder arasyndaǵy boksta Sarıta Devı 60 kelige deıingi salmaq dárejesinde óner kórsetti. Jartylaı fınalda jarysty uıymdastyrýshy el Ońtústik Koreıa sportshysy Jı Na Paktan utylyp qalǵan-dy. Biraq ol tóreshilerdiń sheshimine qarsylyq bildirip, marapattaý kezinde medaldi moınyna ilýden bas tartqan. Keıinnen ol qolyndaǵy qola júldeni Jı Na Parkke syılap, óz narazylyǵyn jasyra almaǵan edi. Nátıjesinde Sarıta Devıdiń júldesi Úndistan boks qaýymdastyǵyna tapsyrylǵan.
Halyqaralyq áýesqoı boks federatsııasy (AIBA) boksshy qyzdy ómir boıyna sporttan shektemek te bolǵan eken. Alaıda, Sarıta Devı tóreshiler sheshimine tanytqan narazylyǵynan keıin keshirim suraǵan.
Sonymen qatar, úndistandyq bylǵary qolǵap sheberi AIBA sheshimine razy ekenin de málimdepti. Aldaǵy ýaqytta sportshy aıyppul retinde 1 000 shveıtsar frankin tóleıtin bolady, dep jazady massaget.kz.
