Júlde qory 19 mln teńge: ulttyq startaptar báıgesiniń jeńimpazdary anyqtaldy
ASTANA. KAZINFORM — Bas júlde — 10 000 000 teńge gro.now (Almaty) jobasyna buıyrdy, dep habarlaıdy Jasandy ıntellekt jáne tsıfrlyq damý mınıstrliginiń baspasóz qyzmeti.
Shymkentte ótken Digital Qazaqstan 2026 forýmynyń sahnasynda elimizdiń úzdik tehnologııalyq startaptary óz jobalaryn sarapshylar men ınvestorlarǵa tanystyrdy.
Birneshe aı boıy Qazaqstannyń túkpir-túkpirinen kelgen startaptar ulttyq deńgeıdegi fınalǵa shyǵý úshin baq synap, 19 mln teńge júlde qory úshin jarysty. Digital Qazaqstan Battle fınalynda elimiz boıynsha iriktelgen 20 úzdik joba naqty naryqta synalǵan tehnologııalyq sheshimderin usynyp, óz ónimderin Qazaqstanda jáne shetelde damytý múmkindigin kórsetti.
Qatysýshylar jasandy ıntellekt, «aqyldy qala», bıznes úderisterdi avtomattandyrý, bilim berý tehnologııalary jáne tsıfrlandyrýdyń ózge de baǵyttary boıynsha jobalaryn tanystyrdy. Fınalıster qatarynda JolScan, aitomaton, Lady Taxi, SanEduPortal, Kasibi Taxi, LoyaBonus, Okushy, CortexAI, Proji, zhihaz.kz, SmetaHub, gro.now, Reco, AR Sana, Qalam, Ai-mektep, Mathlab, Help Hand, KenDala jáne Numerus boldy.
Fınaldyq kezeńde jobalardy memleket, ınvestıtsııa jáne tehnologııa salasynyń ókilderinen quralǵan qazylar alqasy baǵalady.
— Tartysty ótken fınal qorytyndysy boıynsha jeńimpazdar anyqtaldy. Bas júlde — 10 000 000 teńge gro.now (Almaty) jobasyna buıyrdy. Ekinshi oryn men 5 000 000 teńgeni Cortex AI (Qyzylorda) ıelendi. Úshinshi oryn jáne 3 000 000 teńge AR Sana (Astana) jobasyna berildi. Sonymen qatar kórermender tańdaýy boıynsha Qalam AI (Shymkent) startaby 1 000 000 teńge syıaqyǵa ıe boldy, — delingen habarlamada.
Jeńimpaz jobalar:
- gro.now — marketıngtik zertteý jáne naryqty taldaý platformasy
- Cortex AI — búırek transplantatsııasynan keıingi asqyný qaýpin boljaıtyn medıtsınalyq júıe
- AR Sana — balalardyń sóıleý qabiletin damytýǵa arnalǵan health-tech platforma
- Qalam AI — qaǵazǵa jazylǵan mátindi tanıtyn jáne ony taldap, retteıtin «aqyldy qalam»
— Fınalǵa shyǵý — óz ıdeıamyzdy búkil el aldynda synap kórýge jáne sarapshylardan keri baılanys alý úshin úlken múmkindik. Joba salanyń damýyna úles qosyp, jańa seriktester tabýǵa kómektesedi dep senemiz. Bul biz úshin komandamyzdyń áleýetin kórsetip, óńirlerden shyqqan jobalardyń da el deńgeıinde básekege túse alatynyn dáleldeıtin múmkindik, — dedi fınalǵa shyqqan AR Sana kompanııasynyń bas dırektory Aınur Nurádil.
Baıqaý birneshe kezeńnen turdy: aldymen ótinimder qabyldanyp, jobalar talaptarǵa saı tekserildi. Keıin óńirlik jartylaı fınaldar ótip, olardyń nátıjesinde fınalıster anyqtaldy. Qazylar startaptardy naryqtaǵy suranys, komanda sapasy, damý múmkindigi jáne ınvestıtsııalyq tartymdylyǵy boıynsha baǵalady.
Uıymdastyrýshylardyń aıtýynsha, Digital Qazaqstan Battle — tek qarjylaı qoldaý alý múmkindigi ǵana emes. Fınalıster keń aýdıtorııaǵa tanylyp, ınvestorlardyń nazaryn aýdaryp, óz jobalaryn damytýǵa jańa múmkindikterge ıe boldy.
— Bul joba myqty tehnologııalyq startaptar tek iri qalalarda ǵana emes, óńirlerde de damyp jatqanyn kórsetedi. Fınal tájirıbe almasýǵa, ınvestorlarmen baılanys ornatýǵa jáne qatysýshylardyń kásibı deńgeıin dáleldeýge múmkindik berdi, — dedi Astana Hub bıznes baǵdarlamalar keńsesiniń dırektory Áshimbek Ábilǵazınov.
Aıta keterligi, Digital Qazaqstan 2026 forýmy seriktester men demeýshilerdiń qoldaýynyń nátıjesinde uıymdastyryldy. Barlyq shyǵyn demeýshiler esebinen jabyldy.
Budan buryn Tsıfrlyq damý mınıstrligi alǵashqy Digital Nomad Residency ıegeriniń esimin jarııalady.