Júktilikti josparlap júrgen áıelder 12 túrli tekserýden tegin óte alady

ASTANA. KAZINFORM — Eger tekserý barysynda qandaı da bir patologııa anyqtalsa, áıelderge arnaıy saýyqtyrý baǵdarlamalary usynylady, dep habarlaıdy vedomstvonyń baspasóz qyzmeti.

Densaýlyq saqtaý mınıstrligi áıelderdiń densaýlyǵyn nyǵaıtý jáne ana men balaǵa qaýipsiz júktilik qalyptastyrý úshin jańa sharalar qabyldap jatyr. Bul jumystar «Analar saýlyǵy» arnaıy baǵdarlamasy aıasynda júrgizilip jatyr.

Mınıstrliktiń málimetinshe, analar óliminiń negizgi sebepteriniń biri — áıelderdegi ekstragenıtaldyq aýrýlar jáne júktilikke aldyn ala daıyndyqtyń tómen bolýy.

— Baǵdarlama sheńberinde elimizde alǵash ret fertıldik jastaǵy, júktilikti josparlap júrgen áıelder MÁMS aıasynda 12 negizgi medıtsınalyq tekserýden tegin óte alady. Eger tekserý barysynda qandaı da bir patologııa anyqtalsa, olarǵa arnaıy saýyqtyrý baǵdarlamalary usynylady. Qazirgi tańda Qazaqstanda áıelderdiń pregravıdaldyq daıyndyqpen qamtylý deńgeıi 46,1%-dy qurap otyr, — delingen habarlamada.

Mamandardyń aıtýynsha, júktilikti durys josparlaý bolashaq ana men náresteniń densaýlyǵyna tónetin qaýip-qaterdi aıtarlyqtaı tómendetedi.

Budan buryn Pavlodarda júkti áıelderge arnalǵan pansıonat ashylatynyn jazǵanbyz.