Júktilikke baılanysty áleýmettik tólemdi rásimdeýde qandaı qatelikter jıi kezdesedi
ALMATY. KAZINFORM – «Memlekettik áleýmettik saqtandyrý qory» AQ Almaty qalalyq bólimshesi dırektorynyń orynbasary Balǵyn Satbekqyzy júktilik pen bosanýǵa baılanysty áleýmettik tólemdi rásimdeý kezinde jıi kezdesetin qatelikter týraly aıtyp berdi.
Onyń aıtýynsha, resmı eńbek shartynyń bolmaýynan, jumys berýshiniń áleýmettik aýdarymdy ýaqytyly tólemeýinen, qujattaǵy málimettiń memlekettik aqparattyq júıedegi derekpen sáıkes kelmeýinen jáne qujattar toptamasynyń tolyq usynylmaýynan júkti áıelderde kóp másele týyndaıdy.
- Keıbir jaǵdaıda qor qosymsha tekserý júrgizedi. Buǵan áleýmettik aýdarymdardyń ýaqytyly tólenbeýi, tabys kólemi men tólengen áleýmettik aýdarymdardyń sáıkes kelmeýi, ártúrli óńirlerdegi birneshe jumys berýshiden bir mezgilde áleýmettik aýdarymdardyń túsýi nemese áıeldiń júktilik boıynsha esepke turǵanǵa deıin áleýmettik aýdarymdardyń bolmaýy negiz bolýy múmkin. Eger tekserý barysynda zań buzýshylyq anyqtalsa nemese áleýmettik tólemdi taǵaıyndaýǵa zańdy negiz bolmasa, tólem taǵaıyndaýdan bas tartý týraly sheshim qabyldanady, - dep túsindirdi maman.
Balǵyn Satbekqyzy bala týýy tirkelgennen keıin ata-analarǵa SMS-habarlama jiberiletinin atap ótti. Sol arqyly memlekettik organdarǵa barmaı-aq, bala týýyna baılanysty memlekettik járdemaqyny jáne bala bir jarym jasqa tolǵanǵa deıingi kútimine baılanysty áleýmettik tólemdi rásimdeýge bolady.
Aıtýynsha, memlekettik áleýmettik saqtandyrý qoryna áleýmettik aýdarymdar tólenbegen, jumys istemeıtin analarǵa bala bir jarym jasqa tolǵanǵa deıingi kútimine baılanysty aı saıynǵy memlekettik járdemaqy respýblıkalyq bıýdjet qarajaty esebinen tólenedi.
- Búginde áleýmettik tólemge ótinishti ekinshi deńgeıli bankterdiń mobıldi qosymshalary, eGov.kz portaly jáne Enbek.kz elektrondyq eńbek bırjasy arqyly da berýge bolady. Elektrondyq formatta bala kútimine baılanysty áleýmettik tólemdi, sondaı-aq mansap ortalyǵynda jumyssyz retinde tirkelgen jaǵdaıda jumysynan aıyrylýyna baılanysty áleýmettik tólemdi rásimdeý qyzmeti qoljetimdi, - dedi ol.
Sondaı-aq maman áleýmettik tólemge tek jaldamaly qyzmetkerler ǵana emes, mindetti áleýmettik saqtandyrý júıesine qatysyp, áleýmettik aýdarymdar tóleıtin ózin-ózi jumyspen qamtyǵan azamattar da quqyly ekenin eske saldy. Olar júktilik pen bosanýǵa, bala bir jarym jasqa tolǵanǵa deıingi kútimge, eńbekke qabilettiliginen aıyrylýǵa, jumysynan, asyraýshysynan aıyrylýǵa baılanysty áleýmettik tólem ala alady.
Eske salaıyq, Jambyl oblysynda júktiligi úzilip, múgedektik alǵan áıel aýrýhanadan 5 mln teńge óndirip aldy.
