Júktilik jáne bosanýǵa qatysty asyra tólem alǵan 113 kelinshekke qylmystyq is qozǵaldy

ASTANA. KAZINFORM — Júktilik jáne bosanýǵa qatysty asyra tólem alǵan 113 adamǵa qatysty qylmystyq is qozǵaldy. Bul týraly Eńbek jáne halyqty áleýmettik qorǵaý mınıstrliginiń keńeıtilgen alqa májilisinde vedomstvo basshysy Svetlana Jaqypova aıtty.

— 2024 jyly Memlekettik áleýmettik saqtandyrý qorynan 958 mlrd teńge somasyna 1,4 mln azamatqa tólemder júrgizildi. 15 óńirde júıege qatysýshylarǵa tólenetin tólemder kólemi Memlekettik áleýmettik saqtandyrý qorynan jumys isteıtin azamattar úshin áleýmettik aýdarymdar túsiminen asyp tústi. Tek bir ǵana áleýmettik tólemniń maksımaldy mólsherine shekteýler joq — bul júktilik jáne bosanýǵa qatysty tólemder. Sondyqtan jekelegen azamattar jasandy túrde ulǵaıtylǵan tólem mólsherin alý úshin zańnamadaǵy olqylyqtardy izdestirýde. Bul osy júıege adal qatysýshylardyń áleýmettik aýdarymdaryn qaıta bólýde ádiletsizdikke ákep soǵady, — dedi mınıstr.

Onyń dereginshe, qazirgi ýaqytta 113 alýshyǵa qatysty 16 qylmystyq is qozǵaldy. Olardyń keltirgen zalal somasy 158,4 mln teńgeni qurady. 2024 jyldyń qyrkúıeginen bastap 1,5 myńǵa jýyq alýshy óz erkimen tabysynyń jasandy ósirilgenin rastady. Osylaısha Memlekettik áleýmettik saqtandyrý qory aktıvteri 3,4 mlrd teńge somasynda saqtaldy.

— Mınıstrlik zańnamalyq bastamalar toptamasyn ázirledi. Olardy iske asyrý aldaǵy 10 jylǵa mindetti áleýmettik saqtandyrý júıesiniń qarjylyq turaqtylyǵynyń kókjıegin keńeıtýge múmkindik beredi, — dedi Svetlana Jaqypova.

Eske sala keteıik, ShQO-da feldsher jazadan qutylý úshin júktilik týraly jalǵan anyqtama jasaǵanyn jazǵan bolatynbyz.