Júktilik saqtaldy: dárigerler pyshaqtalǵan áıeldiń jaǵdaıy týraly aıtty

AQTAÝ. KAZINFORM – Dárigerler Munaıly aýdanynda kúıeýinen pyshaq jaraqatyn alǵan jábirlenýshiniń jaǵdaıyn turaqty aýyr dep baǵalaıdy. Júktilik saqtalady, túsik túsirý qaýpi joq. Bul týraly Mańǵystaý oblystyq kópsalaly aýrýhanasynyń baspasóz qyzmeti habarlady. 

– Zardap shekken adam esin biledi. Jaǵdaıy turaqty aýyr. Júktilik saqtaldy, alańdaýshylyq joq. Budan bylaı hırýrgııalyq aralasý bolmaıdy, emdeý jalǵasýda, - dep habarlady medıtsınalyq mekemeniń baspasóz qyzmeti. 

Eske salaıyq, Munaıly aýdany Mańǵystaý aýylynda kúıeýi áıelin kóshede turǵyndardyń kózinshe pyshaqtap tastaǵan bolatyn. Saldarynan 24 jastaǵy áıel aýyr dene jaraqatymen aýrýhanaǵa jetkizildi. 

Dárigerler naýqasqa shuǵyl ota jasap, aman alyp qaldy. Áıeldiń aıaǵy aýyr ekeni belgili boldy. 

Osy oqıǵa boıynsha polıtsııa qylmystyq is qozǵap, kúdiktini qamaýǵa aldy. Sondaı-aq kúdiktini ustaýǵa qatysqan ishki ister organdarynyń qyzmetkerlerine qatysty da tergeý júrip jatyr.