Júktilik pen bosanýǵa baılanysty tólemdi eń kóp alǵan áıelder qaı óńirde
ASTANA. KAZINFORM — 2026 jyldyń alǵashqy jeti aıynda Qazaqstanda júktilik pen bosanýǵa baılanysty áleýmettik tólem alǵan áıelder sany boıynsha Túrkistan oblysy kósh bastady. Bul kezeńde atalǵan óńirde 12 817 áıelge áleýmettik tólem taǵaıyndalǵan.
«Azamattarǵa arnalǵan úkimet» memlekettik korporatsııasynyń resmı telegram paraqshasyndaǵy aqparatqa sáıkes, ekinshi orynda Almaty qalasy — 12 034 alýshy. Úshinshi orynǵa Astana qalasy jaıǵasqan. Elordada qańtar-shilde aılarynda júktilik pen bosanýǵa baılanysty áleýmettik tólemdi 11 426 áıel alǵan.
Almaty oblysynda bul kórsetkish 8 290 adamdy qurady. Úzdik bestikti Shymkent qalasy túıindedi — munda 8 283 áıel áleýmettik tólem alǵan.
Osylaısha, alǵashqy bestikke kirgen óńirlerde jalpy 52 850 áıel júktilik pen bosanýǵa baılanysty áleýmettik tólem alǵan.
Bul tólem mindetti áleýmettik saqtandyrý júıesine qatysýshy jumys isteıtin áıelderge júktilik pen bosanýǵa baılanysty tabysynan aıyrylǵan jaǵdaıda beriledi. Onyń mólsheri, atap aıtqanda, júktilik pen bosanýǵa baılanysty demalysqa shyqqanǵa deıingi sońǵy 12 aıdaǵy ortasha aılyq tabysqa jáne eńbekke jaramsyzdyq kúnderiniń sanyna baılanysty esepteledi.
Aıta keteıik, júktilik pen bosanýǵa baılanysty birjolǵy áleýmettik tólemdi bala kútimine baılanysty aı saıynǵy áleýmettik tólemmen shatastyrmaý kerek. Bala týǵannan keıin mindetti áleýmettik saqtandyrý júıesine qatysýshylarǵa onyń 1,5 jasqa deıingi kútimine baılanysty bólek áleýmettik tólem qarastyrylǵan. Onyń mólsheri sońǵy eki jyldaǵy ortasha aılyq tabystyń 40 paıyzy negizinde esepteledi.
Buǵan deıin endi júktilik pen bosanýǵa baılanysty tólemdi mobıldi qosymsha arqyly rásimdeýge bolatynyn jazdyq.
