Júktilik pen bosaný tólemderiniń kólemi keıingi 5 jylda 5 ese artqan

ASTANA. KAZINFORM – Qoldanystaǵy zańnamada júktilik pen bosanýǵa baılanysty beriletin áleýmettik tólemderdiń joǵarǵy shegi belgilenbegen. Áleýmettik kodekske osy máseleni jańasha retteıtin ózgertýler enýi múmkin. Bul týraly Eńbek jáne halyqty áleýmettik qorǵaý mınıstrligindegiler Kazinform saýalyna joldaǵan jaýapta aıtty.

- Qazirgi kezeńde qoldanystaǵy zańnama normalarynda júktilik pen bosaný boıynsha tólemderdiń joǵarǵy shegi belgilenbegen. Qazirgi tańda Áleýmettik kodekske áleýmettik tólemderdi, onyń ishinde júktilik pen bosaný boıynsha áleýmettik tólemderdi taǵaıyndaýdyń parametrlik ózgeristerin boljaıtyn ózgerister men tolyqtyrýlar engizý jóninde tıisti usynystar ázirlenip joldandy. Áleýmettik saqtandyrý júıesi adamnyń joǵaltqan kirisiniń bir bóligin óteýge baǵdarlanǵanyn atap ótken jón, - dep jazylǵan resmı málimette.

Vedomstvonyń deregine sensek, keıingi bes jylda bala kútimine baılanysty áleýmettik tólem rásimdeýshilerdiń sany 1,2 ese kóbeıse, tólengen somanyń jalpy kólemi 5 esege jýyq ósken.

- 2019 jyly 191,4 myń adam júktiligi jáne bosanýy boıynsha 77,5 mlrd teńge somaǵa áleýmettik tólem aldy. Al 2024 jyly 245,7 myń adam 385,6 mlrd teńge áleýmettik tólem aldy, - dep jazylǵan mınıstrlik málimetinde.

Aıta ketsek, 2024 jyldyń qorytyndysy boıynsha shamamen 1,4 mln qazaqstandyq jalpy somasy 958,3 mlrd teńgege bes áleýmettik táýekel boıynsha Memlekettik áleýmettik saqtandyrý qorynan áleýmettik tólem aldy.

Sondaı-aq, byltyr kúzde Antıkor Shyǵys Qazaqstan oblysynda 780 áıeldiń dekrettik tólemdi arttyrý úshin jeke kásipker retinde tirkelgenin anyqtaǵan bolatyn.

Jýyrda Eńbek jáne halyqty áleýmettik qorǵaý mınıstrliginiń keńeıtilgen alqa májilisinde vedomstvo basshysy Svetlana Jaqypova júktilik jáne bosanýǵa qatysty asyra tólem alǵan 113 adamǵa qatysty qylmystyq is qozǵalǵanyn aıtty.