Júktiligi úzilip, múgedektik alǵan áıel aýrýhanadan 5 mln teńge óndirip aldy
ASTANA. KAZINFORM — Dárigerler jibergen kemshilikter úshin aýrýhana mıllıondaǵan teńge ótemaqy tóleıtin boldy, dep habarlaıdy Talas aýdandyq sotynyń baspasóz qyzmeti.
Jambyl oblysy Talas aýdanynda talap qoıýshy júktiliktiń 10-aptasynda aýdandyq aýrýhanada «erte toksıkoz» dıagnozymen em alǵan. Aýyr jaǵdaıyna qaramastan, oǵan tolyq kólemde jáne klınıkalyq hattamalarǵa sáıkes medıtsınalyq kómek kórsetilmegen. Merziminen buryn shyǵarylǵannan keıin áıeldiń jaǵdaıy kúrt nasharlap, osyǵan baılanysty ol oblystyq aýrýhanaǵa shuǵyl túrde jatqyzylǵan, medıtsınalyq kórsetkishter boıynsha júktilik úzilgen. Keıinnen talap qoıýshyǵa III toptaǵy múgedektik belgilendi. Medıtsınalyq jáne farmatsevtıkalyq baqylaý departamentiniń tekserýimen medıtsına qyzmetkerleri tarapynan kóptegen buzýshylyq anyqtaldy: klınıkalyq hattamalardyń saqtalmaýy, tekserýler men emdeý kóleminiń jetkiliksizdigi, beıindi mamandardyń konsýltatsııalarynyń bolmaýy, sondaı-aq medıtsınalyq qujattamanyń tıisinshe júrgizilmeýi.
Tekserý qorytyndysy boıynsha aýrýhana ákimshilik jaýapkershilikke, al dárigerlerdiń biri tártiptik jaýapkershilikke tartyldy. Usynylǵan dáleldemelerdi baǵalaı otyryp, sot jol berilgen buzýshylyqtar men talap qoıýshynyń densaýlyǵynyń nasharlaýy arasynda tikeleı baılanys bar degen qorytyndyǵa keldi. Sot keltirilgen zııandy óteý týraly talap qoıýdy oryndy dep tapty.
— Sot sheshimimen jaýapkerden azamatsha B.-nyń paıdasyna 246 myń teńge kóleminde materıaldyq zalal, moraldyq zııannyń ótemaqysy — 5 mln teńge, ókildiń qyzmetterin tóleýge jumsalǵan shyǵystar — 300 myń teńge óndirildi. Sot sheshimi zańdy kúshine endi, — delingen sottyń habarlamasynda.
Osydan buryn Aqmolada sýrrogat ana sátsiz júktilik úshin aqshany qaıtaratynyn jazdyq.
