Juqtyrǵandardyń 96% balalar: Astanada qyzylsha qaıta órshidi
ASTANA. KAZINFORM — Sońǵy tórt aptada qalada 500-den astam adamnan qyzylsha aýrýy anyqtalǵan. Olardyń 96 paıyzy — balalar.
Bul týraly Jibek Joly arnasynyń «Búgin LIVE» baǵdarlamasyna suhbat bergen Astana qalasy sanıtarııalyq-epıdemıologııalyq baqylaý departamenti basshysynyń orynbasary Janna Pralıeva aıtty.
— Búgingi tańda qyzylsha aýrýynyń órshýi baıqalyp otyr. Qaýly shyqqan kezde 403 jaǵdaı tirkeldi. Al qazir, tórt aptanyń qorytyndysy boıynsha 887 bastapqy dıagnoz anyqtaldy. Onyń 581 dıagnozy zerthanalyq nátıjemen rastalǵan. Qyzylsha kóbine 14 jasqa deıingi balalar arasynda kezdesedi. Bul jas tobyndaǵy balalardyń 90–95 paıyzy ekpe almaǵan. Sondyqtan da olar qyzylsha aýrýyn juqtyrǵan. Ekpe almaǵan balalardyń kóbinde ata-analary ekpeden bas tartqan nemese ýaqytsha medıtsınalyq kórsetilim boıynsha almaǵan. Keıbir eresekter arasynda buryn ekpe alǵanyn nemese almaǵanyn rastaıtyn qujattary joq jandar bar, — deıdi maman.
Spıkerdiń sózinshe, Astana qalasynyń bas sanıtarlyq dárigeri arnaıy qaýlyǵa qol qoıǵan. Endi mektepterde ekpe almaǵan oqýshylardyń tizimi jasalady. Bul shara aýrýdyń odan ári taralýynyń aldyn alý úshin qolǵa alynǵan.
— Qyzylsha — tez taralatyn vırýs. Ol aýada eki saǵat boıy saqtalady. Eger balalar ekpe almasa, mindetti túrde juqtyryp, aýyryp qalady. Aýrýdyń qaýpi onyń asqynýlarynda. Qyzylshamen aýyrǵan balalarda pnevmonııa, panentsefalıt sııaqty aýyr asqynýlar bolýy múmkin. Sondyqtan ekpe alý talap etiledi. Qaýly boıynsha, josparly túrde aýrýhanaǵa jatatyn balalardyń ekpe týraly málimeti bolmasa, olar jatqyzylmaıdy. Shuǵyl jaǵdaıda aýrýhanaǵa jatqyzý qajet bolsa, ekpesi joq balalardy qabyldaýǵa bolady. Al josparly ota nemese sozylmaly aýrýmen jatqyzylatyn balalardyń qujattarynda mindetti túrde qyzylshaǵa qarsy ekpe týraly málimet bolýy tıis. Sebebi aýrýhanalarda ártúrli haldegi balalar jatyr, olardyń ımmýnıteti álsiz. Eger ekpesi joq bala qosylsa, naýqastardy juqtyrýy múmkin, bul olardyń jaǵdaıyn odan ári álsiretedi, — deıdi ol.
Osy oraıda Janna Pralıeva ekpeden bas tartqan ata-analarǵa qyzylshadan qorǵanýdyń mańyzyn túsindirdi.
— Ata-analar ekpe alýǵa mindetti túrde jaýapty. Eger bala ekpe almaı, qyzylshamen aýyrsa, durys kútim bolmaǵan jaǵdaıda aýrý asqynyp ketse, jaýapkershilik ata-ananyń ózine tıedi. Sondyqtan aldyn ala ekpe alý mańyzdy. Sol kezde el boıynsha epıdemıologııalyq jaǵdaı turaqty bolyp, aýrý órshýi tirkelmeıdi, — deıdi Janna Pralıeva.
Eske sala keteıik, Aqtóbede de balalar arasynda qyzylsha juqtyrǵandar kóbeıdi.
Arýjan Armanqyzy