Júktilikti qalypty ótkizý úshin ne isteý kerek - dáriger keńesi
ASTANA. QazAqparat - Astananyń biliktiligi joǵary akýsher-gınekologtary júkti áıelderge óz keńesterin berdi, dep habarlaıdy QazAqparat tilshisi qalalyq densaýlyq saqtaý basqarmasyna silteme jasap.
Astana qalasy №3 Perınataldy ortalyǵynyń akýsher-gınekolog dárigeri Dınara Qabylova deni saý sábıdi kóterýge jáne týýǵa kómektesetin 10 qarapaıym erejeni aıtty.
«Eń aldymen mekenjaıy boıynsha júktilikke ýaqytyly tirkelip, dárigerlerdiń nusqaýlaryn buljytpaı oryndap, der kezinde qaralyp júrý kerek. Odan keıin balanyń dúnıege kelýine qolaıly jaǵdaı (psıhologııalyq, emotsıonaldyq, áleýmettik, fızıkalyq jáne ekologııalyq jaǵdaılar) jasaý mańyzdy», - deıdi Dınara Qabylova.
Dárigerdiń aıtýynsha, júktiliktiń qalypty ótýi úshin dárýmender, mıkroelementter men mıneraldy tuzdary bar paıdaly, tabıǵı, esh qospasyz azyq-túlik paıdalaný kerek. Shyryndar, jemis, kókónis, jańǵaqtar, bal, sút ónimderi, jumyrtqa, et, balyq, burshaq tuqymdastardy as mázirinde qoldaný qajet.
«Aǵzalardyń (teri, ókpe, baýyr, búırek) dárisiz turaqty jáne tıimdi jumys isteýine qol jetkizip, jaman ádetterden aýlaq bolý kerek. Jeńil, qolaıly kıimdi kıip, kúndelikti tabıǵı dene belsendiligin arttyrý qajet. Kúızelisten arylý daǵdylaryn meńgerip, tolyqqandy dem alýdy úırený kerek», - dep óz sózin tolyqtyrdy Dınara Qabylova.
Sonymen birge, bolashaq balany tárbıeleý úshin klassıkalyq mýzyka, ádemi tabıǵat, sýretter men ádebıet, úı ishiniń jaılylyǵy da artyq etpeıdi. Jáne bosaný protsesine múmkindik bolsa, seriktestiń qatysqany jón.
Astana qalasy Qoǵamdyq densaýlyq saqtaý basqarmasynyń shtattan tys akýsher-gınekolog dárigeri, №3 Perınataldy ortalyǵy bas dárigeriniń orynbasary Gúlnaz Dosmyrzaeva júkti áıelderge belsendi qımyldaýǵa keńes beredi.
«Júkti áıelderge basseınde, ıoga toptarynda jattyǵý jasaý usynylady. Kóptegen fıtnes-klýbtarda nárestesiniń dúnıege kelýin kútken áıelder úshin arnaıy toptar bar. Fıtbolmen jattyǵýlar, bı, sozylýǵa arnalǵan gımnastıkalar bolashaq ananyń ózin tamasha fızıkalyq formada ustaýyna kómektesedi», - dedi Gúlnaz Dosmyrzaeva.
Barlyq dárigerler bir aýyzdan júkti áıelderge taza aýamen demalýdy, jıi serýendeýdi, bólmeni jeldetý qajettiligi usynylady.
«Júktilik kezeńinde aýyr salmaqty kóterýge bolmaıdy, sebebi bul merzimnen erte bosanýǵa ákep soǵýy múmkin. Bıik óksheli aıaq kıim kııý de usynylmaıdy. Sebebi, qulap qalýyńyz múmkin nemese aıaq tamyrlaryńyzǵa da zardap kelýi múmkin. Júkti áıeldiń ómir saltynyń taǵy bir quramdas bóligi - jaqsy uıqy. Uıqyǵa keshki saǵat 10-da jatyp jáne tańǵy 7-den keshikpeı turý kerek», - dedi G. Dosmyrzaeva.
