Júktilik kezinde kólik apatyna túsý qaýpi joǵary
ASTANA. QazAqparat - Eger júkti áıel kólik basqarsa, avarııa yqtımaldyǵy 1,5 esege artady. Kanadalyq ǵalymdardyń júrgizgen zertteý nátıjesi negizinde jasaǵan osyndaı tujyrymyn Canadian Medical Association Journal jarııalady.
Avtomobıl júrgizetin 500 myń júkti áıel arasynda saýalnama júrgizgen ǵalymdar júktiliktiń qalypty belgileri - álsizdik, júrek aıný, uıqynyń buzylýy, qyraǵylyq pen den qoıýdyń tómendeýi avarııaǵa túsý yqtımaldyǵyn arttyratynyn anyqtady. Ǵalymdar 50 bolashaq ananyń bireýi jol kólik oqıǵasyna tap bolatynyn eseptegen. Ári júktiliktiń úshinshi aıynda apat yqtımaldyǵy 42 paıyzǵa arta túsedi eken.
Er júrgizýshiler men áıel júrgizýshilerdiń avarııaǵa túsýi týraly resmı salystyrma derekter tabylmady - bálkim, ǵalymdar názik jandylardy kemsitip, aıyptaýdan tartynǵan bolar. Alaıda Reseıde pikir bir jaqty: áıelder erlerge qaraǵanda kólikti uqypty jáne abaılap júrgizedi, biraq ekstremaldyq jaǵdaılarda, psıhıkalyq erekshelikterge oraı, kerisinshe bolyp jatady. Al, júktilik bul problemany kúrdelendire túsetini belgili.
