Júkti kelinshekti jatqyzýdan bas tartqan aýrýhana: ÁMSQ tekserý júrgizdi

NUR-SULTAN. QazAqparat – Mindetti áleýmettik medıtsınalyq saqtandyrý qory kelinshekti emdeýge jatqyzýdan bas tartqan elordalyq aýrýhanaǵa qatysty tekserý nátıjesin jarııa etti, dep habarlaıdy QazAqparat tilshisi.

Qor baspasóz qyzmetiniń málimetinshe, Oksana Ermahanovaǵa qatysty jaıtqa oraı №2 qalalyq kóbeıindi aýrýhanaǵa jospardan tys monıtorıng júrgizilgen.

Bul tekserýge atalǵan kelinshektiń Facebook áleýmettik jelisinde jarııalaǵan jazbasy sebep bolyp otyr.

«Monıtorıng nátıjesinde medıtsınalyq aqparattyq júıe jazbalarynyń málimetterine sáıkes, kezekshi gınekolog patsıentti qaraý barysynda kórsetilimderdiń bolmaýyna baılanysty ony shuǵyl aýrýhanaǵa jatqyzýdan bas tartqany anyqtaldy. Degenmen, patsıent medıtsınalyq kómekke júgingen kezde saqtandyrý mártebesine qaramastan shuǵyl aýrýhanaǵa jatqyzýǵa negiz bolatyndaı jaı-kúıine shaǵymdanǵan» dep atap ótedi qordan.

Osyǵan oraı atalǵan shaǵymnyń negizi bar dep sanalady. Jáne de qor №2 qalalyq kópbeıindi aýrýhanaǵa qatysty ekonomıkalyq áser etý sharalaryn qoldanady.

«Qor medıtsınalyq kómektiń kepildendirilgen tegin kólemi jáne Mindetti áleýmettik medıtsınalyq saqtandyrý aıasynda patsıentterdiń medıtsınalyq kómek alý quqyǵyn barlyq ýaqytta qorǵaıdy. Osyǵan oraı medıtsınalyq qyzmetti sapasyz kórsetý nemese odan bas tartý týraly faktilerdi 1406 baılanys ortalyǵyna nemese Qoldau 24/7 mobıldi qosymshasyna habarlaýǵa shaqyramyz. Olar boıynsha tekserý júrgiziledi jáne buzýshylyqtar anyqtalǵan jaǵdaıda ekonomıkalyq áser etý is-sharalary qabyldanady»,- dep atap ótedi qordan.