Júkti kelinshekke ishtegi balany jaryp alý jáne bastaǵy isikti alyp tastaý otalary qatar jasaldy
ASTANA. QazAqparat - Astana qalasynyń turǵyny 28 jastaǵy kelinshekke mıdaǵy isikti alyp tastaý jáne ishtegi sharanany alý otalary birge jasaldy, dep habarlaıdy «University Medical Center» kororatıvtik qory baspasóz qyzmeti.
Astana qalasynda 1988 jylǵy kelinshek júktilik boıynsha turǵylyqty mekenjaıynda dárigerlerdiń qaraýynda bolǵan. Qyrkúıekte jaǵdaıy nasharlap, basy aýyryp, sol jaǵynda álsizdik paıda bolyp derti ýshyǵa túsken. 21 qazanda bas mıyna kompıýterlik tomografııa jasalyp, sol jaq samaıynda kólemdi isik barlyǵy anyqtaldy. Ana men bala ulttyq ǵylymı ortalyǵyna jatqyzylyp, Ulttyq neırohırýrgııa ortalyǵynyń mamandarymen birlesip, qaıta tekserildi. Mıyna magnıtti-rezonansty tomografııa jasalyp, isiktiń barlyǵy rastaldy.
Naýqastyń jaǵdaıynyń aýyrlyǵy eskerile otyryp, ol Ulttyq neırohırýrgııa ortalyǵyna aýystyrylady. Konsılıým ótkizilip, eki otany qatar jasaý jóninde sheshim qabyldandy.
Sóıtip, 26 qazanda Ulttyq neırohırýrgııa ortalyǵynyń neırohırýrgteri men Ana men bala ulttyq ǵylymı ortalyǵynyń akýsher-gınekolog dárigerleri birlesip, mıshyqtyń isigi alyp tastady jáne balany ishten jaryp alý otasyn atqardy.
Eki operatsııa da sátti ótip, salmaǵy 2260 gr, boıynyń uzyndyǵy 46 sm bolatyn qyz bala dúnıege keldi. Ári qaraı tıisti kómek kórsetý úshin náreste Ana men bala ulttyq ǵylymı ortalyǵynyń neonatologııa bólimine birden aýystyryldy. Al áıeldiń jaǵdaıy otadan keıin 7 kúnnen soń qalpyna kelip, ol da Ana men bala ulttyq ǵylymı ortalyǵyna jetkizildi.
Osylaısha, elimizdiń eki iri klınıkasy - Ulttyq neırohırýrgııa ortalyǵy men Ana men bala ulttyq ǵylymı ortalyǵynyń birlese atqarǵan jumysynyń nátıjesinde aman qalyp, náresteli bolǵan áıel 7 qarashada aýrýhanadan shyǵarylyp, úıine qaıtady.
