Júkti áıeldi kólikte bosandyryp alǵan kezder de boldy – akýsher

ÓSKEMEN. QazAqparat – 5 mamyr – Halyqaralyq akýsherler kúni. Jaýapkershiligi mol bul salada jarty ǵasyrǵa jýyq ter tógip kele jatqan Saıran Ýálıeva Shyǵys Qazaqstan oblysy Ulan aýdanynda turady, dep habarlaıdy QazAqparat tilshisi.

«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetinshe, Ulan aýdany Taıynty aýylynda dúnıege kelgen Saıran Ýálıeva 1978 jyly medıtsınalyq ýchılışeni bitirip, akýsher mamandyǵy boıynsha dıplom alǵan. Mine, sol ýaqyttan beri týǵan jerinde akýsher bolyp ter tógip keledi.

«Osynshama ýaqyt ishinde neshe túrli oqıǵa boldy ǵoı. Keıde tolǵaǵy kelgen áıeldi perzenhanaǵa jetkizbeı, kólikte bosandyryp alýǵa týra keldi. Jetpisinshi-sekseninshi jyldary aýyldarda jol da, kóshe shamdary da, uıaly telefon da joq. Áıelder úılerinde taǵat tappaı kútip otyrady. Al biz qaqaǵan aıaz ben qarly boranǵa qaramastan, kún-tún demeı olarǵa qaraı umtylatynbyz. Bul salany tańdaǵanyma esh ókinip kórgen emespin. Adamǵa paıdań tıip, basqanyń qýanyshyna ortaqtasý – keremet sezim», - deıdi akýsher.

Qazir oǵan kezinde ózi bosandyrǵan áıelderdiń júkti qyzdary men nemereleri kelip jatady. Tájirıbeli maman árqaısysyna qolushyn sozýǵa ázir.

«Akýsherlik – eń jaýapty mamandyqtardyń biri. Óıtkeni seniń qolyńda bir emes eki adamnyń ómiri turady. Zeınet jasyna jetsem de áli kúnge deıin súıikti salamda júrmin. Jas mamandarǵa kórgen-bilgenimdi úıretkim keledi», - deıdi Saıran Ýálıeva.