Júkti áıeldi bosandyrǵan qasqyrlar

Júktiliktiń segizinshi aıynda júrgen áıeldiń basqa qaladan úıine kele jatyp kóligi buzylyp qalady. Dál sol sátte burqasyn daýyl soǵyp turǵandyqtan aınalada ne bolyp jatqandyǵy da kórinbeıdi. Ne isterin bilmegen amerıkandyq hanym jolda bir kólik kezdesip qalar degen oımen kólikten shyǵyp, jaıaý júre bastaıdy. Boran odan saıyn údeı túsedi. Esi shyqqan Merı bar kúshin salyp 800 metr jol júredi. Kenet tolǵaǵy bastalyp ketedi. Áıel qary az degen jerdi taýyp, otyra bergende qatty aýyrsyný men qorqynyshtan esinen tanyp qalady. "Birneshe mınýttan keıin esimdi jıdym. Meniń basym alyp qasqyrdyń belinde jatyr, bul úıirdiń basshysy sekildi. Qalǵan qasqyrlar meni jeldiń yzǵarynan saqtaý úshin aınala qorshap yq jasap turdy. Olardyń sany toǵyzǵa jýyq boldy. Tolǵaq janyma batyp bara jatqasyn qorqyp ta úlgermedim. 20 mınýttan keıin sábıdi dúnıege ákeldim. Bir qanshyq qasqyr abaılap qana kindikti kesti de, janyndaǵy qasqyr ekeýi sábıdi jalaı bastady. Basqa qasqyrlar meni jylytpaq bolyp odan saıyn jaqyndaı tústi", - dep eske alady Merı. Áıel balany qolyna almaq bolǵanymen áli jetpeıdi. Kindik kesken qasqyr, balany murnymen Merıdiń keýdesine tirep turady. Balanyń jylaǵan daýsynan tiri ekeni bilinedi de, azdan soń Merı sábıin emize bastaıdy. Úıirdiń basshysy onyń betindegi qar men jasty jalaǵan eken. Bári de sońyna deıin áıel men balany qorshap turady. Merı Kranıktiń týystary qaraýsyz qalǵan kólikti tapqannan keıin izdeý jumystaryn kúsheıte túsedi. Іzdeýshiler alystaǵy qasqyr tobyn kórgende bir sumdyq boldy degen oımen oq atady. Qasqyrlar qashyp ketedi. Týystary aǵash túbindegi áıel men balany tiri ekendikterin kórgende tańǵalady. Al qasqyrlar bala men anany birjola alyp ketkenshe alystan baqylap turǵan kórinedi. Merı Kranık kúni keshe ǵana tilshilerge suhbat berip, kishkentaı Bıll (qasqyrlar bosandyrǵan uly) ekeýiniń bir úıir qasqyrdy izdeýge shyǵatyndyǵyn málimdegen, dep jazady massaget.kz.