Júkti áıelderge ne úshin skrınıngtik tekserýden ótý qajet – akýsher-gınekolog jaýaby

ALMATY. QazAqparat - Júkti áıel júktiliktiń 12 aptasyna deıin esepke turýy kerek. Sebebi, barlyq genetıkalyq aýytqýlar dál osy kezeńde, 13 apta jáne alty kúnnen keshiktirilmeı anyqtalady. Bul týraly Almaty qalalyq №11 emhananyń áıelder keńesi bóliminiń akýsher-gınekology Kamıla Abaıdildaeva aıtty, dep habarlaıdy QazAqparat tilshisi.

«Bul ýltradybystyq jáne gormondarǵa venozdyq qannyń bıohımııalyq taldaýynan turatyn 12 aptada ótkiziletin birinshi skrınıng - uryqta Daýn sındromy sııaqty tuqym qýalaıtyn patologııalardyń damýynyń genetıkalyq qaýpin baǵalaý úshin jasalady. Sonymen qatar, týylmaǵan náresteniń densaýlyǵyna jáne júktiliktiń nátıjesine áser etetin faktorlardy anyqtaıdy. Sondaı-aq, esepke turý kezinde júkti áıel barlyq tekserýden ótedi. Olar: jalpy zár taldaýy, júkti áıelder úshin qan toby mindetti, merez jukpasyna, AITV, V jáne S gepatıti ınfektsııalaryna qan taldaýy alynady. Osy taldaýlardyń kez kelgenine oń nátıje bolǵan jaǵdaıda, dárigerdiń keńesi qajet. Protsestiń kezeńin naqtylaý úshin qosymsha zertteýler júrgizý qajet bolýy múmkin. 16 aptada – áıel tekserýge keledi»,- dedi dáriger.

Júkti áıel ekinshi skrınıngti júktiliktiń 19-20 aptasynda ótýi tıis.

«Osy kezeńde uryqtyń damý aqaýlary anyqtalady, mysaly, júrek aýrýy, nesep-jynys júıesi, asqazan-ishek joldary, ókinishke oraı, ómirge sáıkes kelmeıtin aqaýlar bar. Sońǵy jaǵdaıda bosaný, ıaǵnı júktilikti toqtatý máselesi týyndaıdy. Kelesi baqylaý 24-25 aptada. Osylaısha, aıyna bir ret áıel adam tekserilýge keledi. Bul bizge uryqtyń qalypty damyp kele jatqanyn anyqtaýǵa múmkindik beredi, ol belgilengen merzimge sáıkes kelýin, júrek soǵysy estilýi jáne de uryqtyń qozǵalysyna synaq júrgiziledi. Kórsetkishterge sáıkes, 34 aptadan keıin uryqtyń KTG jasaımyz, bul uryqtyń jaǵdaıyn júrek soǵysynyń sıpaty boıynsha baǵalaýdyń zamanaýı ádisi», - dedi Kamıla Abaıdildaeva.

Úshinshi skrınıng 30 aptadan keıin jasalady. Munda basty nazar sýdyń mólsherine, atap aıtqanda, sýdyń kóptigi nemese sýdyń azdyǵy nazarǵa alynady.

«Júktiliktiń 20-shy aptasynda qoıylǵan keıbir dıagnozdar, mysaly, bala joldasynyń durys ornalaspaýy - jaqsy damýy múmkin ekenin aıtqym keledi. Bárine belgili, bala joldasy durys ornalaspasa, áıeldi kesar tiligi jasaýǵa daıyndaıdy, sebebi, qan ketý qaýpi bolady. Eger 30 aptada bul dıagnoz qaıtalanbasa, sáıkesinshe dıagnoz joıylady jáne bosaný ádisi de ózgeredi», - dep túıindedi akýsher-gınekolog Kamıla Abaıdildaeva.

Foto: ocdn.eu