Júkti áıelderdi dári-dármekpen qamtamasyz etý tizimin qaıta qaraý qajet - senator

ASTANA. QazAqparat – Áıelderdi medıtsınalyq qyzmet túrlerimen qamtý deńgeıin kúsheıtý kerek. Bul týraly Senat depýtaty Aqmaral Álnazarova aıtty, dep habarlaıdy QazAqparat tilshisi.

Onyń aıtýynsha, ana men bala óliminiń joǵary deńgeıi de alańdatyp otyr. Medıtsınalyq saqtandyrý júıesi engizilgen sátten bastap, saqtandyrý júıesine enbegen reprodýktıvti jastaǵy áıelder júktilikke josparly túrde daıyndyq pen medıtsınalyq emdeý qyzmetterimen tıisti deńgeıde qamtylmaı otyr

«Júktiliktiń onynshy aptasynan keıin ǵana áıelder memlekettiń jeńildik alatyn sanatyndaǵy azamattarynyń qataryna qosylyp, saqtandyrylǵan mártebege ıe bolady. Alaıda, osy aralyqta bolashaq anany baqylaýǵa alý men emdeýi úshin mańyzdy ýaqyt joǵalady. Elimizdegi ana ólimi boıynsha aýyr jaǵdaıdy eskersek, mindetti áleýmettik medıtsınalyq saqtandyrý júıesinde reprodýktıvti jastaǵy áıelderge kórsetiletin medıtsınalyq qyzmet kólemderin qaıta qaraý qajet», - dedi A. Álnazarova Senattaǵy Úkimet saǵatynda densaýlyq saqtaý máselesin talqylaý kezinde.

Onyń paıymynsha, osy sanattaǵy áıelderge arnalǵan ambýlatorııalyq dári-dármekpen qamtamasyz etý tizimin qaıta qaraý qajet.

Budan buryn habarlanǵandaı, Qazaqstanda árbir altynshy júktilik túsik jasatýmen aıaqtalady.