Júkti áıelderdegi anemııa merziminen buryn bosanýǵa ákelýi múmkin
ALMATY. QazAqparat- Júkti áıelderde qandaı aýrýlar jıi kezdesetini jáne olar balaǵa qanshalyqty qaýipti ekenin almatylyq dáriger aıtyp berdi, dep habarlaıdy QazAqparat tilshisi.
Almatydaǵy №2 qalalyq perınataldyq ortalyqtyń akýsher-gınekology Qymbat Abdraımovanyń aıtýynsha, júkti áıelderde gestatsııalyq qant dıabeti bolýy múmkin - bul áıeldiń júktilik kezinde qandaǵy qant deńgeıiniń joǵarylaýy. Bul ana aǵzasy qandaǵy qant deńgeıin baqylaý úshin jetkilikti ınsýlın shyǵara almaıtynyna baılanysty. Eger gestatsııalyq qant dıabeti emdelmese, bul balaǵa keri áser etedi.
«Júkti áıelderde qandaǵy gemoglobın deńgeıi qalypty deńgeıden tómendegen kezde anemııa jıi kezdesedi. Bul aǵzanyń erıtrotsıtterdi jetkiliksiz óndirýine baılanysty. Júkti áıelderde anemııa náresteniń salmaǵynyń tómendigi jáne merziminen buryn bosaný sııaqty problemalaryna ákelýi múmkin. Sondaı-aq, áıeldiń júktilik kezinde qan qysymy kóterilip, zárinde aqýyz paıda bolǵan kezde preeklampsııa qaýpi bar. Bul jaǵdaı ana men bala úshin qaýipti bolýy múmkin, sebebi ol merziminen buryn bosanýǵa, platsenta problemalaryna jáne basqa asqynýlarǵa ákeledi»,- deıdi dáriger.
Sonymen qatar, ol ınfektsııalardyń da qaýipti ekenin aıtty.
«Tumaý jáne tsıtomegalovırýs sııaqty vırýstyq ınfektsııalar túrli asqynýlarǵa ákelýi múmkin. Sondyqtan júktilik kezinde turaqty medıtsınalyq kómek alý jáne densaýlyqty baqylaý mańyzdy», - deıdi Qymbat Abdraımova.
