Júkti áıelder úshin qaýipsizdik beldigin durys taǵyný erejeleri
ASTANA. 13 aqpan. QazAqparat - Kóptegen áıelder júkti bola tura, kólik quralyn basqarýdy jalǵastyrady.
Bul rette, júkti kelinshekter bolashaq shaqalaqtaryna zııan tıgizýi múmkin degen oımen qaýipsizdik beldikterin taǵynbaıdy. Jol apattary saldaryn zerttegen kóptegen halyqaralyq sarapshylar júkti áıel qaýipsizdik beldigin taǵynǵan jaǵdaıda mert bolǵan balalardyń jartysyna jýyǵyn aman alyp qalýǵa bolar edi degen toqtamǵa keldi.
Osy rette QR ІІM Jol polıtsııasy komıteti júkti áıelderge arnalǵan qaýipsizdik beldigin taǵyný erejelerin taratty. Halyqaralyq sarapshylar keńes beredi: qaýipsizdik beldigi onyń tómengi jaǵy ishtiń tómen tusynan (jambasty ustap turatyndaı), al joǵarǵy jaǵy sol jaq ıyqtan keýdeniń ortasynan ótýi tıis. Sondaı-aq beldiktiń joǵarǵy jaǵy keýdeniń ústinen, al tómengisi - keýdeniń tómengi jaǵynan (ishtiń joǵarǵy jaǵynan) da ótýi múmkin. Bul rette, beldik tym tartyp, ne tym bos turmaýy tıis.
Onymen qosa, júkti áıelderge arnalǵan arnaıy qaýipsizdik beldikteri de bar. Mundaı qurylǵylarǵa oryndyqqa arnalǵan jastyqsha da qosa beriledi. Ol otyrǵan áıeldi joǵary kóterip turady, sol arqyly qursaqtyń jaraqattanýyn barynsha azaıtyda. Bul qurylǵylar tejegishti shuǵyl basqanda, tipti iri apat bolǵan jaǵdaıda júkti áıeldi soqqylardan saqtap qalady.
Júkti áıelderge arnalǵan qaýipsizdik beldikteriniń taǵy bir túri bar. Olar«Maternity seat belt» dep atalady. Olar kádimgi qaýipsizdik beldikterinen ıkemdiligimen erekshelenedi, jáne onyń úsh emes, tórt bekitkishi bar. Júkti áıel onymen qysymdy sezbeıdi jáne bolýy múmkin jaraqattardan anaǵurlym saqtalady.
