Júkti áıelder men kámelettik jasqa tolmaǵandarǵa ákimshilik aıyppuldardyń kólemi 30 paıyzǵa tómendetilýi múmkin

ASTANA. QazAqparat - Ákimshilik quqyqbuzýshylyq jasaǵan júkti jáne kámelettik jasqa tolmaǵandarǵa qatysty aıyppuldar kólemi 30 paıyzǵa tómendetilýi múmkin. Bul týraly búgin Ortalyq kommýnıkatsııalar qyzmetinde ótken brıfıngte QR Ádilet vıtse-mınıstri Záýresh Baımoldına málim etti.

«Ákimshilik aıyppul salǵan sotqa jáne quzyrly memorganǵa jumsartý jaǵdaılaryna baılanysty aıyppul kólemin 30 paıyzǵa deıin tómendetý quqyǵy berilgen», - dep atap ótti ol.

Onyń sózine qaraǵanda, bul jeńildikter quqyqbuzýshylar tolyq kinásin moıyndaǵan kezde jáne soǵan ókinish bildirgen kezde ǵana qoldanylady.

«Qazir eger atalǵan tulǵalar tolyq kinásin moıyndap, óz isine ókinetindigin aıtsa, shyǵyndy tolyqtaı ótese nemese ákimshilik quqyqbuzýshylyq júkti áıeldermen nemese kámelettik jasqa tolmaǵandarmen jasalsa, aıyppul kólemin 30 paıyzǵa qysqartýǵa bolady», - deıdi Z.Baımoldına.