Júkti áıelder memleketten 6 mln teńge jymqyrdy

ASTANA. QazAqparat - Qyzylorda oblysy boıynsha Memlekettik kirister departamentiniń Ekonomıkalyq tergeý qyzmeti áleýmettik baǵdarlamalardy júzege asyrý salasynda memleket qarajatyn jymqyrýdyń kezekti faktisin anyqtady, dep habarlaıdy QazAqparat.

Memleket qazynasynan 6 mln 162 myń teńgeniń qarajatyn qymqyrǵan qylmystyq top áıelderden quralǵan, ıaǵnı «Azamattar úshin úkimet» memlekettik korporatsııasy» UAQ, «Áleýmettik tólemderdi vedomstvoaralyq esepteý ortalyǵy» departamentiniń qyzmetkerleri jáne jeke kásipker birigip áreket etken.
Áleýmettik tólemderdi vedomstvoaralyq esepteý ortalyǵynyń qyzmetkerleri D.B. men A.A. 2016 jyldyń qańtar-sáýir aralyǵynda Qyzylorda qalasynda turatyn jumys istemeıtin on júkti áıeldi taýyp, olarǵa qajetti qujattardy jınaqtaǵan. Al kásipker A.S. óziniń jáne kúıeýiniń atyna tirkelgen jeke kásipkerlerik qujatymen áıelderge jaldamaly jumysshysy retinde áleýmettik aýdarymdar «aýdaryp otyrǵan».
Muqııat daıyndalǵan kelisim boıynsha jeke kásipkerdiń ótkizgen jalǵan qujattary negizinde, ortalyq qyzmetkerleri esh kedergisiz járdemaqy taǵaıyndaý týraly sheshim shyǵarǵan.
Alaıda qupııa ashylyp, qylmys anyqtaldy. Qyzylorda oblysy boıynsha MKD ETQ-i QR Qylmystyq kodeksiniń 190-baby, 4-bóliginiń 2-tarmaǵymen jáne 385-baby 1,2-bólikterimen qylmystyq is júrgizip, qylmystyq júıeni tolyǵymen ashty.
Qyzylorda qalalyq №2 sotynyń 7 qyrkúıektegi sheshimimen barlyq qatysýshylardyń kinási dáleldenip, tıisti jaza taǵaıyndaldy. Árqaısysy 3 jyldan bas bostandyǵynan aıryldy, alaıda jas balasy bolýy sebepti jazasyn óteý keıinge qaldyrylady.