Júkti áıelder karantın sharalaryn eki ese kóbirek ustanýy kerek – Dáriger keńesi

NUR-SULTAN. QazAqparat - Medıtsına ǵylymdarynyń doktory, professor, QR UǴA akademıgi, Qazaqstan reprodýktıvti medıtsına qaýymdastyǵynyń prezıdenti Vıacheslav Lokshın júkti áıelderge koronavırýstan qorǵaný týraly keńes berdi, dep habarlaıdy QazAqparat tilshisi.

«Júkti áıel óziniń ǵana emes, balanyń da densaýlyǵyna jaýapty ekenin este saqtaýy tıis. Sondyqtan, júkti áıelder karantın sharalaryn eki ese kóp saqtaýy kerek. Olar adam kóp jerden aýlaq bolýǵa, qoǵamdyq kólikti paıdalanbaýǵa, sýpermarketterge barmaýǵa tyrysýy tıis. Elimizde 6 myńnan astam júkti áıel koronavırýspen aýyrdy. Biraq vırýstyń balaǵa berilmeıtinin atap ótken jón. Álem boıynsha balalardyń 99% deni saý bolyp týǵan», - deıdi V. Lokshın.

Alaıda, anasy gıgıenany saqtamasa, bala ómirge kelgen soń 1-2 kúnde aýyryp qalýy múmkin.

«Júktiliktiń alǵashqy aptalaryna vırýstyń qalaı áser etetinin naqty bilmeımiz. Alǵashqy juqtyrý jaǵdaılary aqpan-naýryz aılarynda tirkeldi, ázirge esh aqparat joq. Biraq koronavırýs ınfektsııasy kezinde uryqtyń qatyp qalýy, túsik tastaý jaǵdaılary bolǵanyn bilemiz. Bálkim koronavırýs saldarynan bolǵan shyǵar. Júkti áıelderde ókpeniń qabynýy aýyr túrde ótedi. Al koronavırýstyń ózge adamdarmen shamalas ótetinin tájirıbe kórsetti. Biraq koronavırýstyń janama áseri degen túsinik bar. Aýrý juqtyrǵandar sany kúrt kóbeıgende, kóptegen klınıkalar jabyldy jáne barlyq áıelderdi qabyldap úlgermedi.

Sonda koronavırýspen emes, akýsherlik patologııamen baılanysty asqynýlar kóp tirkelip, bıyl Qazaqstanda ana ólimi kóbeıdi. Vırýs týraly málimet az bolǵanda, jas otbasylarǵa júktilikti pandemııa aıaqtalǵansha keıinge qaldyrýdy aıtatynmyn. ıAǵnı, ınfektsııa qaýpinen muqııat qorǵaný qajettigin umytpaý kerek», - deıdi professor.

Onyń sózine qaraǵanda, júkti áıelder úshin de, basqalar úshin de taǵam quramynda dárýmender bolýy kerek. Jemister men kókónisterdi kóbirek tutynǵan jón.

«Ásirese, dıabetpen aýyratyn naýqastar maıly, tátti, unnan jasalǵan taǵamdardy kóp jemeýi qajet. Olar vırýs úshin jaqsy orta jasaıdy. Nelikten dıabetpen aýyratyndar ınfektsııaǵa beıim keledi? Qant dıabeti kezinde ımmýnıtet tómendeıdi, vırýstyń tez kóbeıý múmkindigi bolady. Gıpertonııa, semizdikpen aýyratyn naýqastarda da koronavırýs aýyr ótedi. Olardyń arasynda ólim-jitim sany óte joǵary», - dep qorytyndylady Vıacheslav Lokshın.