Júkti analarǵa keńes beretin kitaptyń tusaýkeseri ótti
ASTANA. QazAqparat - Búgin elordada jýrnalıst Janar Kóbekbaıdyń «Ana baqyty nemese júkti áıelge arnalǵan kúndelik» atty kitabynyń saltanatty tusaýkeser rásimi ótti.
Shara barysynda kitaptyń avtory J.Kóbekbaı ıdeıanyń qalaı týyndaǵanyn, kitapty jaryqqa shyǵarýǵa ne ıtermelegenin ortaǵa saldy. «Ózim júkti kezimde árbir aptany tolyq sıpattap beretin, balanyń damýy men bolashaq ana kútimi týraly jazylǵan ana tilimizde birde-bir ádebıet tappadym. Kitap bylaı tursyn, qarapaıym aqparattyń bolmaýy meni qynjyltty. Osy bir aqtańdaqtyń kesirinen biz elimizdiń túkpir-túkpirinde ornalasqan qazaq tildi analar aýdıtorııasynyń suranysyna esh usynys jasaı almaýdamyz. Mine, osy olqylyqtyń ornyn sál de bolsa toltyryp, teńizge tamǵan tamshydaı óz úlesimdi qosyp, júktilik kezimde jazylǵan dúnıemdi usynyp otyrmyn» - deıdi avtor.
Sonymen qatar ol basylymnyń mobıldi nusqasy shyǵatynyn aıtyp ótti.
Kelesi kezekte sóz alǵan kitaptyń medıtsınalyq retsenzenti, tájirıbeli dáriger Almaz Ibragımov bul kitap árbir júkti áıelde bolýy tıis dep sanaıtyndyǵyn jetkizdi. «Ol óte jeńil, medıtsınalyq turǵydan durys ári qyzyqty jazylǵan. Dárigerler keıde qıyndatyp jiberetin tustaryn avtor barynsha túsinikti tilmen jetkizgen. Kitap keń aýdıtorııaǵa arnalǵan, ári egizderdiń analaryna jazylǵan ómirden alynǵan taptyrmas aqparattar da bar. Bul - kitaptyń biregeıligi dep oılaımyn», - degen pikirin bildirdi ol.
