Júkterdiń memlekettik shekara arqyly ótý merzimderin qysqartý kerek — Úkimet basshysy
ASTANA. KAZINFORM — Júk jáne tranzıttik tasymal kólemin arttyrý qajet. Bul týraly búgin Úkimet otyrysynda Premer-mınıstr Oljas Bektenov aıtty.
— Memleket basshysy 2035 jylǵa qaraı gazdandyrý deńgeıin 80%-ǵa deıin jetkizýdi tapsyrdy. Bıyl bul kórsetkish 64,5%-ǵa jetýge tıis. Energetıka mınıstrligine «QazaqGaz» kompanııasymen jáne óńir ákimdikterimen birlesip, qoldanystaǵy ınfraqurylymdy jańǵyrtý, magıstraldyq gaz qubyrlaryn ýaqtyly salý jáne gaz salasyndaǵy iri jobalardy júzege asyrý sharalaryn qabyldaýdy tapsyramyn, — dedi Oljas Bektenov.
Sonymen qatar Premer-mınıstr Kólik mınıstrligine múddeli memlekettik organdarmen jáne kompanııalarmen birge josparlanǵan ınfraqurylymdyq jobalardyń ýaqtyly aıaqtalýyn qamtamasyz etip, júk jáne tranzıttik tasymal kólemin arttyrýdy tapsyrdy.
— Budan bólek, Kólik jáne Qarjy mınıstrlikteri memlekettik organdarmen birge júkterdiń memlekettik shekara arqyly ótý merzimderin qysqartý, ákimshilik kedergilerdi joıý jáne biryńǵaı tsıfrlyq ilespe qujattardy engizý baǵytynda naqty sharalar qabyldaýy kerek. Qosymsha júk aınalymyn qamtamasyz etip, logıstıka ortalyqtaryn damytýǵa jáne qoldanystaǵy kólik dálizderiniń júktemesin arttyrýǵa erekshe nazar aýdarý qajet, — dedi Úkimet basshysy.
Buǵan deıin Premer-mınıstr Úkimettiń basty mindeti ınflıatsııany 10%-dan tómen deńgeıde ustap turý ekenin aıtqan bolatyn.
