Júkterdi temirjol kóligimen tasymaldaý tabıǵı monopolııa salasyna jatpaıdy – Bas prokýratýra

ASTANA. QazAqparat – Elimizde júkterdi temirjol kóligimen tasymaldaý tabıǵı monopolııa salasyna jatpaıdy. Bul týraly Májilis depýtattarynyń saýalyna Bas prokýror Berik Asylovtyń jaýabynda aıtylǵan, dep habarlaıdy QazAqparat tilshisi.

«Ýəkiletti organdar (Bəsekelestikti qorǵaý jəne damytý agenttigi men Indýstrııa jəne ınfraqurylymdyq damý mınıstrligi) Qazaqstan Respýblıkasynyń kólik-logıstıkalyq əleýetin damytýdyń 2030 jylǵa deıingi tujyrymdamasyna (Úkimettiń 30.12.2022 jylǵy №1116 qaýlysymen bekitilgen) səıkes júk tasymaly naryǵynda óz qyzmetin ulttyq jəne jeke tasymaldaýshylar júzege asyrýyna bolatynyn, olar erkin bəsekelestik jaǵdaıynda júkterdi temir jol kóligimen tasymaldaıtynyn kórsetken. Budan bólek, atalǵan organdardyń jaýaptaryna səıkes júkterdi temirjol kóligimen tasymaldaý naryǵy bəsekege qabiletti bolyp sanalady jəne tabıǵı monopolııa salasyna jatpaıdy», - dedi Bas prokýror jaýabynda.