Júkteme kóp, jańa fýnktsııalar qosylmaıdy – eGov portaly jańǵyrtylatyn boldy

ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev eGov portalyn jańǵyrtý jumystary qalaı júretinin aıtyp berdi.

Mınıstr eGov-tyń qazirgi jaı-kúıine taldaý júrgizilgenin atap ótti.

− eGov portaly 2013 jylǵy tehnologııalar negizinde qurylǵan jáne óz múmkindigi sheginde jumys istep keledi. Jańartý kezinde qıyndyqtar boldy, jańa fýnktsııalardy iske qosýda shekteýler bar, ınfraqurylymǵa júkteme artyp keledi, servıster qoljetimdi bolmaıdy. Osy jaǵdaılardy nazarǵa alyp, eGov-ty jańa tehnologııalyq sheshimder negizinde jańǵyrtýǵa kiristik, − dedi Jaslan Mádıev Úkimettiń búgingi otyrysynda.

Dálirek aıtqanda, qyzmetter qaıta qurastyrylyp jatyr, bul olardy birneshe batyrma basý arqyly alýǵa múmkindik beredi. Elektrondyq úkimet shlıýzi jańartylǵan, ıntegratsııalaý protsesteri jaqsarǵan.

− 2000 paıdalanýshydan turatyn fokýs-topta testileýden ótip jatqan vırtýaldy AI-assıstent quryldy. Kórý qabileti nashar jáne zaǵıp azamattar úshin daýystyq jáne mátindik navıgatsııa arqyly eGov-qa qoljetimdilik artady. Sondaı-aq áreketke qabiletsiz tulǵalardyń qamqorshylary úshin múmkindikter keńeıtiledi. Osy qadamdar ınklıýzıvti, ornyqty jáne zamanaýı tsıfrlyq platformany qurýǵa baǵyttalǵan, − deıdi Tsıfrlyq damý mınıstri.

Sondaı-aq, memlekettik servısterdi bıznes qajettilikterine saı etý úshin eGov Business portaly jumys isteıdi. Bul qosymshada jeke kásipkerdi tirkeý, salyq kúntizbesi, sertıfıkattar, elektrondyq qol qoıý qyzmetteri avtomattandyrylǵan.

− Bul bıznestiń quqyqtyq saýatyn arttyrady. Bolashaqta áleýetti klıentterdi izdeý, naryqtyq analıtıka, suranysty monıtorıngteý sııaqty jańa servıster iske qosylady. Barlyǵy kásipkerlikti qoldaý men damytý úshin, − dep túsindirdi mınıstr.

Buǵan deıin J. Mádıev Tarazda balabaqsha kezegin 92% qysqartqan tásildi barlyq óńirge engizýdi usynǵan edi.

Aıta keteıik, ótken jyly Qazaqstanda memlekettik qyzmettiń 91% onlaın kórsetilgen. «Ulttyq qor – balalarǵa», «Stop-kredıt», «Kólik ıelený tarıhy», «Qumar oıyndarǵa qatysýdan erikti túrde bas tartý» sekildi tanymal servıster iske qosylǵan.

Sondaı-aq, eGov arqyly kedergi keltirgen kólik ıelerine anonımdi habarlama jiberýge bolady.